«Qytaı kespesi - ýly, orys shaıy shýly bolyp tur...» - respýblıkalyq basylymdarǵa sholý
***
«Keshe Parlament Májilisiniń Tóraǵasy Nurlan Nyǵmatýlınniń jetekshiligimen ótken jalpy otyrysta Ujymdyq qaýipsizdik týraly shart uıymynyń quqyqtyq bazasyn nyǵaıtýǵa baǵyttalǵan tórt zań jobasy qaralyp, maquldandy», - dep jazady «Egemen Qazaqstan» gazeti búgingi sanyndaǵy «Ujymdyq jumylýǵa qajetti qujattar qabyldandy» degen taqyryptaǵy maqalasynda. Depýtattardyń talqysyna birinshi kezekte Ujymdyq qaýipsizdik týraly shart uıymy ujymdyq qaýipsizdik júıesiniń kúshteri men quraldarynyń mártebesi týraly zań jobasy tústi. Bul kúshter taraptar ózderiniń qurylymdaryn qabyldaýshy taraptyń aýmaǵyna, eger osy is-qımyl olardyń ulttyq zańnamasyna qaıshy kelmegen jaǵdaıda ǵana qoıylǵan mindetterdi oryndaý úshin jiberedi. Qabyldaýshy tarap, eger onyń ulttyq zańnamasyna qaıshy kelmese, óziniń aýmaǵyna ujymdyq qaýipsizdik júıesiniń kúshteri men quraldaryn engizý týraly sheshim qabyldaıdy.
«Egemen Qazaqstan» gazetiniń jazýynsha, Parlament Senatynyń Tóraǵasy Qaırat Mámı Rýmynııanyń Qazaqstan Respýblıkasyndaǵy Tótenshe jáne ókiletti elshisi Emıl Rapchany bizdiń elimizdegi dıplomatııalyq qyzmetiniń aıaqtalýyna baılanysty qabyldady. Senat Tóraǵasy E.Rapchaǵa Qazaqstan-Rýmynııa yntymaqtastyǵyn damytýǵa qosqan úlesi úshin alǵys aıta kelip, rýmyn dıplomatynyń aldaǵy qyzmeti tabysty bolýyna tilektestigin bildirdi. «Rýmynııa Qazaqstannyń Shyǵys Eýropa aımaǵyndaǵy saıası jáne ekonomıkalyq áriptesi bolyp tabylady», - dep atap ótken Q.Mámı eki el parlamentteriniń arasyndaǵy baılanystardy nyǵaıtýdyń mańyzdylyǵyn nazar aýdardy.
***
«Alash aınasy» gazetiniń búgingi nómirinde azyq-túlik sapasyna qatysty maqala jaryq kórdi. Óıtkeni qazirgi tańda sapasy talapqa saı otandyq azyq-túlik ónimderi dúken sórelerinde joqtyń qasy. Halqymyz tutynatyn azyq-túlikten bastap jemis-jıdek, kókónistiń basym bóligimen qamtamasyz etýdi basqa elder moınyna alǵan. Osy jaıttar tereń zerdelengen jarııalanym «Qytaı kespesi - ýly, orys shaıy shýly bolyp tur...» degen taqyryptaǵy maqalada keńinen baıandalǵan. «Osyǵan deıin qytaıdyń sapasyz ónimderine tiksinip kelsek, endi Reseıden keletin azyq-túlikke de kúmánmen qaraıtyn boldyq. Sebebi osyǵan deıin Reseıdiń qazaq naryǵyna jóneltken shoshqa, sıyr etinen, pispe jáne qaqtalǵan shujyqtarynan, Qarǵyzstannyń sarymaılarynan ishek taıaqshalary tabylǵanymen, amalymyzdyń joqtyǵan úndeı almadyq», - dep jazady basylym.
Osy gazettiń turaqty «Dat!» aıdarynda Ál-Farabı atyndaǵy Qazaq ulttyq ýnıversıtetiniń kafedra meńgerýshisi, saıası ǵylymdar doktory, professor Gúlnar Nasımovamen aradaǵy suhbat «Búgingi janjaldar saıası-ıdeologııalyq emes, dinı negizde júredi» degen taqyryppen berilgen. Basylym tilshisiniń barlyq saýaldaryna tuşymdy jaýap bergen ol: «Prezıdent bıylǵy Joldaýynda atap ótkendeı, biz Jańaózendegi oqıǵadan tıisti túıin jasap, odan sabaq alyp, udaıy eskerip otyrýymyz kerek. Qazirgi tańda kelissóz mádenıetin qalyptastyrýdy, melekettik organdar men azamattyq qoǵam ınstıtýttarynyń ózara árekettesý mehanızmderin jetildirýdi jáne saıası turaqtylyqty qamtamasyz etetin tıimdi tehnologııalardy jasaý qajet. Biraq birinshi kezekte áleýmettik-ekonomıkalyq máseleler sheshilýi kerek», - deıdi.
***
Ár jyldary jasyl alańda jasyndaı jarqyldanǵan jigitter óz aty-jónderin álemdik fýtbol tarıhynda altyn áriptermen jazyp ketti. Árkez eńbektegen baladan bastap, eńkeıgen qartqa deıin olardyń esimderin erekshe qurmetpen aıtady. Biri - surmergen shabýylshy, biri - tasqamal qorǵaýshy, biri - áıgili qaqpashy boldy. Olar óreli ónerimen mıllıondaǵan jankúıerdiń júregin jaýlady. Ondaı myqtylar jaıynda talaı kitap, baspasóz betterinde talaı dúnıe jazyldy. Degenmen jýyrda sheteldik tanymal bir saıtynda jasyl alańda dóreki oıyn kórsetip, asqan qatygezdigimen tanylǵan oıynshylardyń tizimin jarııa etti. Osy oıynshylar jaıynda egjeı-tegjeıli bilgińiz kelse, «Aıqyn» gazetindegi «Ońbaǵan» 10 oıynshy» degen taqyryptaǵy maqalaǵa nazar salyńyz.
***
«Reseı astanasynyń meri atynan Uly Otan soǵysynyń ardageri Qaıyrly Jońqabaevqa «Máskeý úshin shaıqasqa 70 jyl» estelik belgisi tabys etildi», - dep jazady «Kazahstanskaıa pravda» gazeti beısenbilik sanyndaǵy «Soldat pobedy» degen taqyryptaǵy maqalasynda. Sergeı Sobıanın qazaqstandyq jaýyngerge joldaǵan hatynda Máskeý túbinde fashıstik áskerdiń talqandalǵanyna 70 jyl tolýymen quttyqtaı kelip: «Máskeý sizderdiń erlikterińizdi eshqashan umytpaıdy. Máskeýlikter shyndyǵynda da jeńis soldattarymen maqtanady», - dep atap ótken. Basylymnyń jazýynsha, Q.Jońqabaev Qyzyl Juldyz, 2 dárejeli Otan soǵysy ordenderimen, birqatar medaldarmen marapattalǵan.
