Qytaı qazaqtary Qýandyq batyrdyń oqaly tonyn Gınnestiń rekordtar kitabyna usynbaq
ASTANA. Naýryzdyń 26-sy. QazAqparat /Rızabek Núsipbekul / - Qytaıdaǵy qandastarymyz Altaı óńirine qarasty Býyrshyn aýdanynda 300 jyldan beri saqtalyp kele jatqan Qýandyq batyrdyń oqaly tonyn Gınnestiń rekordtar kitabyna usynbaqshy.
Bul týraly QazAqparat Qytaıdyń «Táńirtaý» saıtyna silteme jasap habarlaıdy.
Tarıhı derekterge qaraǵanda, Qýandyq batyr Altaı óńirinde 1727-1816 jyldar aralyǵynda ómir súrgen. Aýmaly-tókpeli náýbet zamanda batyrdyń elin-jerin qorǵaý jolynda kórsetken erligine dán rıza bolǵan 12 Abaq kereı eli onyń ıyǵyna osy oqaly tondy jaýypty. Qasıetti murany qazaqtyń qolynan óner tamǵan 13 sheber áıel 90 kún ishinde tigip shyqqan eken. Oqaly ton buǵy maralynyń ılenip, óńdelgen 68 parsha bólek terisinen oıystyrylyp tigilipti. Ony qaraǵaıdyń qanyq boıaýly keri qyzyl qabyǵymen boıap, eki óńiriniń aldyna qundyzdan joryn ustalypty.
Bul 300 jyldyq tarıhy bar qazaqtyń asyl tony qazir Qytaıdyń memlekettik 1-dárejeli mádenı murasy retinde Shynjańnyń Býyrshyn aýdandyq murajaıynda saqtalýly tur. Qazir Qýandyq batyrdyń oqaly tonyna qatysty tarıhı materıaldar izdestirilýde.
