Qytaı qazaqtary arasynda eń kóp taralǵan kitaptar Tańjaryq Joldyulynyń shyǵarmalary - Sh. Abdalıuly
Bul týraly Shyńjań ólkesindegi qazaq tildi kitaptar shyǵaratyn 12 baspanyń basyn biriktiretin «Shyńjań» halyq baspasy korporatsııasy bas redaktorynyń orynbasary Sháriphan Abdalıuly QazAqparat tilshisine bergen suhbatynda aıtty.
Onyń aıtýynsha, atalǵan aqyn-jazýshylardyń shyǵarmalary osy ýaqytqa deıin baspalardan 4-5 retten jaryq kórgen. Onyń ishinde ásirese, aqyn Tańjaryq Joldyulyn erekshe atap ótýge bolady. 1903 jyly 15 naýryzda Іle aımaǵyndaǵy Kúnes aýdanynda ómirge kelip, 1947 jyldyń 6 tamyzynda týǵan jerinde dúnıeden ozǵan qalamgerdiń týǵanyna bıyl 110 jyl toldy. Ol 1935 jyly Qytaı qazaqtarynyń tuńǵysh baspasózi - «Іle ózenin» shyǵarýdy uıymdastyryp, 1940 jyldyń 2 aqpanyna deıin onyń bas redaktory qyzmetin atqarǵan jáne Beıimbettiń «Shuǵa» pesasyn sahnalaǵan.
«Shyńjań ólkesinde týǵan jas aqyn-jazýshylardyń ishinde eń tanymaly Baýyrjan Shormaq pen Mádenıet Muqataı. Al qazaqstandyq qalamgerlerdiń shyǵarmalaryn shyǵarý bizde áli bir júıege túspegen. Oǵan sheteldik avtorlarǵa qalamaqynyń tólenbeýi jáne olardyń ózderi men shyǵarmalaryn basyp shyǵarǵan qazaqstandyq baspalarmen baılanystyń álsizdigi óz yqpalyn tıgizip otyr. Degenmen osy ýaqytqa deıin Abaı Qunanbaıulynyń, Muqaǵalı Maqataevtyń, Ábdijámil Nurpeıisovtyń jáne taǵy basqa da birqatar aqyn-jazýshylardyń kitaptar jaryq kórdi», - deıdi Sh.Abdalıuly.
Onyń sózine qaraǵanda, sońǵy jyldary aýdarma isi jolǵa qoıylyp, Muqaǵalı Maqataev sııaqty keıbir aqyn-jazýshylardyń týyndylary qytaı tilinde jaryq kórgen. Sondaı-aq, ózi de qyzyǵýshylyq bildirip Saıyn Muratbekovtiń - eki, Dıdahmet Áshimhanulynan bir áńgimesin aýdarǵan kórinedi.