Qytaı Qazaqstannyń senimdi dosy ári seriktesi bolyp qala beredi - Sı Tszınpın
«Qazaqstan halqy sizdiń basshylyǵyńyzben memlekettik qurylys pen ulttyq jańǵyrý isinde jańa tabystarǵa jetetini kúmánsiz. Qytaı úkimeti Qazaqstanmen aradaǵy qarym-qatynasqa zor kóńil bóletinin taǵy da qaıtalap aıtqym keledi. Halyqaralyq jaǵdaı qalaı ózgerse de, biz aldaǵy ýaqytta Qazaqstannyń táýelsizdigin, egemendigin jáne terrıtorııalyq tutastyǵyn saqtaýyna qoldaý kórsetemiz. Turaqtylyq pen damýdy qamtamasyz etý jónindegi Siz júrgizip jatqan reformalardy tolyq qoldaı otyryp, sizdiń elińizdiń ishki isterine qandaı da bir kúshterdiń aralasýyna úzildi-kesildi qarsy bolamyz. Qytaı Qazaqstannyń senimdi dosy jáne senimdi seriktesi boldy jáne qala beredi», - dedi Sı Tszınpın.
QHR Tóraǵasy qos eldiń arasyndaǵy qarym-qatynas jańa tarıhı bastaý alǵanyna toqtaldy.
«Dıplomatııalyq baılanys ornaǵaly beri Qazaqstan men Qytaı arasyndaǵy beriktik synynan laıyqty ótken qarym-qatynas únemi jańa mazmunmen tolyǵyp, damýmen jemisin berip keledi. Bizdiń elderimiz birqatar salalardaǵy yntymaqtastyqtyń avangardyna aınaldy. Shekara máselelerin alǵashqylardyń biri bolyp sheshtik. «Bir beldeý, bir jol» baǵdarlamasy aıasyndaǵy yntymaqtastyq úlgisin kórsetip, ındýstrııalandyrý salasyndaǵy halyqaralyq yntymaqtastyqty alǵashqylardyń biri bolyp damyttyq. Biz ekijaqty qarym-qatynasty serpindi damýǵa qol jetkizip, Qytaı dıplomatııasynda teńdesi joq máńgilik jan-jaqty strategııalyq áriptestik deńgeıine shyǵardyq. Búginde Qazaqstan-Qytaı qarym-qatynasy jańa tarıhı bastaý aldy», - dedi Sı Tszınpın.
Buǵan deıin habarlaǵanymyzdaı, Qazaqstan Prezıdenti Qasym-Jomart Toqaev elimizge memlekettik saparmen kelgen Qytaı Halyq Respýblıkasynyń Tóraǵasy Sı Tszınpındi elorda áýejaıynda qarsy aldy.
Sondaı-aq, Aqordada Qytaı basshysy Sı Tszınpındi saltanatty qarsy alý sharasy ótti.
Foto: akorda.kz
