Qytaı Qazaqstannan 3,5 mln tonnaǵa deıin astyq satyp ala alady

ASTANA. QazAqparat – Qytaı Qazaqstannan 3,5 mln tonnaǵa deıin astyq satyp ala alady. Bul týraly «Azyq-túlik kelisimshart korporatsııasy» UK» AQ basqarmasy tóraǵasynyń orynbasary Samat Tenbaev aıtty, dep habarlaıdy QazAqparat tilshisi.

«Sońǵy 2-3 jyldyń ishinde Qazaqstannyń astyq, qaıta óńdelgen ónim satýdaǵy dástúrli naryǵy – Ortalyq Azııada básekeniń kúsheıip kele jatqanyn baıqap otyrmyz», - dedi ol Ortalyq kommýnıkatsııalar qyzmetindegi dóńgelek ústel otyrysynda.

Onyń aıtýynsha, Qazaqstan Ortalyq Azııa elderine jylyna 5 mln tonnaǵa deıin astyq eksporttap keldi.

«Qazirgi ýaqytta kúsheıe túsken básekelestikke baılanysty osy jyldyń sáýirinen Qytaı naryǵyn ashý baǵytyndaǵy jumys qarqyndy júrgizilip jatyr. Negizgi tejeýshi másele – ınfraqurylym, ótkizý múmkindigi. Jarty jylda shamamen 500 myń tonna astyq jóneltildi. Taıaý aradaǵy meje – 1 mln tonnaǵa jetkizý. Qytaı bizden 3,5 mln tonnaǵa deıin astyq satyp ala alady», - dedi Samat Tenbaev.