Qytaı Qazaqstandy barynsha demeı otyryp, strategııalyq áriptestikti jańa sapaly deńgeıge kóterýge daıyn - Hý Tszıntao
ASTANA. Jeltoqsannyń 12-si. QazAqparat /Aıdar Ospanalıev/ - Sońǵy jyldary birlesken talpynystardyń nátıjesinde Qazaqstan- Qytaı qatynastary qarqyndy, turaqty damyp keledi.
Memleketter arasynda saıası senim de artyp otyr. Saýda, ekonomıka, energetıka, qaýipsizdik, gýmanıtarlyq deńgeı sııaqty salalardaǵy yntymaqtastyq erekshe jetile túsýde. Bul týraly búgin QR Prezıdenti Nursultan Nazarbaevpen kezdesýinen soń Qytaı Halyq Respýblıkasynyń Tóraǵasy Hý Tszıntao málim etti, dep habarlaıdy QazAqparat.
Qytaı basshysynyń sózine qaraǵanda, memleketter sonymen qatar Birikken Ulttar Uıymy, Shanhaı yntymaqtastyq uıymy sııaqty ózge de birqatar halyqaralyq deńgeıdegi uıymdar aıasynda turaqty túrde birlesip qyzmet etýde. «Qazaqstan men Qytaı bir-birine jaqsy qoldaý kórsetip keledi. Qytaı bul baǵytta Qazaqstandy barynsha demeı otyryp, strategııalyq áriptestikti jańa sapaly deńgeıge kóterýge daıyn. Sonymen qatar Qytaı energetıka jáne shıkizattyq emes salada da yntymaqtastyqty órbitýge nıetti. Sóıtip, biz eki eldiń baılanystarynyń jan-jaqty damýyna yqpal etetin bolamyz», - dedi Hý Tszıntao.
Onyń aıtýynsha, Qazaqstan men Qytaı qarjy salasynda da birlesip qımyldaýlary kerek. Al gýmanıtarlyq saladaǵy áriptestikti nyǵaıtý úshin Qytaı tarapy ǵylym, bilim, mádenıet, týrızm salalaryndaǵy birlesken qımyldardy jetildirýge ázir. «Meni búgin Qazaqstan basshysyn ózine qolaıly ýaqytta taǵy da Qytaıda bolyp qaıtýǵa shaqyrdym. N.Nazarbaev meniń usynysymdy qabyl alyp, meni de yńǵaıly ýaqytta Qazaqstanda bolýǵa shaqyrdy. Men de Qazaqstan Prezıdentiniń bul usynysyn qýana-qýana qarsy aldym», - dedi Qytaı Halyq Respýblıkasynyń Tóraǵasy.
