Qytaı Qazaqstanda ósimdik maıy zaýyttaryn ashýǵa nıetti
ASTANA. QazAqparat - Qytaılyq kásipkerler Qazaqstan aýmaǵynda ósimdik maılarynyń óndiretin zaýyt turǵyzyp, daıyn bolǵan ónimderdi ımporttaýǵa nıetti, dep habarlaıdy QazAqparat tilshisi.
Bul týraly Astanada ótken «KazOil 2017» konferentsııasynda QR AShM Tamaq qaýipsizdigi departamentiniń tehnıkalyq retteý basqarmasynyń basshysy Zeınolla Sháripov málimdedi.
Zeınolla Sháripov otandyq shıkizattan eksportqa baǵyttalǵan básekege qabiletti jáne sapaly ónim shyǵarýǵa áleýetimizdiń jetkilikti ekenin basa aıtty.
«2016 jylǵy astyq jınaý naýqanynyń qorytyndysyna sáıkes, maıly daqyldar óndirisi 2 mln tonna kólemindegi rekordty kórsetkishke ıe boldy. Bul 2012-2016 jyldar aralyǵyndaǵy ortasha kólemnen 27%-ǵa joǵary. Óńdeý salasynda da oń ózgerister bar, 2016-2017 jyldardyń 10 aıyndaǵy ósimdik maılaryn óndirý kólemi sońǵy jyldary tirkelgen kórsetkishten 22 paıyzǵa artyq», - dep atap ótti ol.
Sońǵy 5 jylda Qazaqstanda maıly daqyldardy egý alqaptary 1,8 mln gektardan 2 mln gektarǵa deıin 10 paıyzǵa ulǵaıǵan jáne onda kúnbaǵys (41%) pen zyǵyr (32%) daqyldary kóptep egilgen. 2021 jylǵa qaraı AÓK damytýdyń 2017-2021 jyldarǵa arnalǵan memlekettik baǵdarlamasy aıasynda maıly daqyldardy egý alqabyn 3 mln gektarǵa deıin ulǵaıtý josparlanyp otyr.
Sondaı-aq, mınıstrlik ókili qazirgi ýaqytta Qazaqstannyń kúnbaǵys jáne ósimdik maılarynyń negizgi ımporttaýshysy Qytaı ekenin atap ótti. 2016-2017 jyldary Qazaqstannan Qytaıǵa 150 myń tonna maıly daqyldar men 41 myń tonna ósimdik maıyn eksporttaǵan.
«Aspan asty eliniń maıly daqyldarǵa degen suranysyn, qazaqstandyq naryqtyń áleýetin jáne yńǵaıly logıstıkany eskersek, qazaqstandyq eksport kóleminiń artýy ábden múmkin. Taǵy bir atap óterligi, QHR Qazaqstan aýmaǵyndaǵy ósimdik maılarynyń óndirisin ınvestıtsııalaýǵa jáne atalǵan ónimderdi ımporttaýǵa daıyn. Jaqynda ǵana qytaılyq «Aıtszıýı» kompanııasy qazaqstandyq seriktesterimen birlesip, SQO Taıynsha aýdanynda jylyna 300 myń tonna ósimdik maıyn óndirýge qaýqarly jańa zaýyt turǵyzdy», - dep óz sózin túıindedi Z.Sháripov.
Eske sala ketsek, 2016 jyly Qazaqstan kúnbaǵys dánderin eksporttaý kórsetkishi boıynsha álemniń úzdik ondyǵyna endi. Álemdik maı daqyldaryn óndirýdegi Qazaqstan úlesi 2 paıyzdy quraıdy.
Aıta keteıik, búgin Astanada alǵash ret «KazOil 2017» Halyqaralyq maı-tońmaı konferentsııasy ótti, onda Qazaqstandaǵy iri maı daqyldaryn óndirýshiler men qaıta óńdeýshileri jáne birqatar múddeli shetel kompanııalarynyń ókilderi jınaldy.
Jıyn sheńberinde «QazAgro» holdınginiń qurylymyndaǵy «Agrarlyq nesıe korporatsııasy» AQ men «Qazaqstannyń maı-tońmaı odaǵy» qaýymdastyǵy» ZTB yntymaqtastyq týraly Memorandýmǵa qol qoıdy. Odan bólek, «QazAgro» holdınginiń ózge enshiles kompanııasy - «Azyq-túlik kelisim shart korporatsııasy» UK» AQ ósimdik maılary naryǵynda birtutas eksporttyq saıasatty qalyptastyrý jóninde birqatar memorandýmdar jasasty.
