Qytaı Qazaqstan jazýshylarynyń kitaptaryn júıeli túrde basyp shyǵarýǵa múddeli
ALMATY. 23 sáýir. QazAqparat - Jaqsy kitaptyń qaı ýaqytta da oqyrmany kóp.
Biz Qazaqstan men Qytaıdyń arasynda baspa isterinde de barys-kelisti damytyp, qarym-qatynas jasaǵymyz keledi. Bul týraly Qytaıdyń «Shyńjań» halyq baspasy korporatsııasy bas redaktorynyń orynbasary Sháriphan Abdalıuly QazAqparat tilshisine bergen suhbatynda aıtty.
«Biz sáýir aıynyń alǵashqy jartysynda Almatyda ótken «Jibek joly boıymen» atty VII Qazaqstandyq halyqaralyq kitap jáne polıgrafııa kórmesine qatystyq. Onda jurtshylyq nazaryna Shyńjań uıǵyr avtonomııalyq aýdanyndaǵy 6 ulttyń tilinde kitaptar shyǵaratyn 12 baspadan sońǵy jyldary jaryq kórgen 300-ge jýyq ónimdi usyndyq. Kórmeden keıin olardy ál-Farabı atyndaǵy Qazaq ulttyq ýnıversıtetiniń ǵylymı kitaphanasy men №13 Muqaǵalı Maqataev atyndaǵy orta mektepke syıǵa tarttyq», - deıdi Sh.Abdalıuly.
Onyń aıtýynsha, Shyńjańdaǵy baspalarda jyl saıyn qazaq tilinde myńnan astam ataýly jańa kitaptar jaryq kóredi. Budan bólek oqyrman júreginen jol taýyp, jurtshylyq arasynda tez taralyp ketken kitaptar suranysqa qaraı birneshe márte qaıta basylyp shyǵady.
«Qazaqstan jazýshylarynyń da kitaptaryn shyǵaryp jatyrmyz. Endi ony júıeli jolǵa qoıǵymyz keledi. Ondaǵy basty qıyndyq avtorlardyń ruqsatyn alýda bolyp otyr. Kóbine-kóp baılanys jasaı almaımyz. Qazaqstanda sondaı-aq, dúnıejúzi ádebıetterin aýdarǵan óte myqty óreli aýdarmashylar bar. Olardyń úzdik eńbekterin endi Qytaıda da shyǵarsaq degen oımyz bar», - deıdi Sháriphan Abdalıuly.
