Qytaı Qazaqstan arqyly Eýropaǵa jol ashqysy keledi - sarapshylar
Dóńgelek ústelde mamyr aıynda Beıjińde ótken «Bir beldeý, bir jol» halyqaralyq yntymaqtastyq forýmynyń nátıjeleri, iri jobalardy júzege asyrý aıasyndaǵy yqpaldastyq joldary talqylandy.
Jıynǵa ataqty dıplomattar men sarapshylar, onyń ishinde Qytaı Syrtqy ister mınıstrligi Kópshilik dıplomatııa jónindegi konsýltatsııalyq keńes músheleri, Elbasy kitaphanasy Taldaý ortalyǵynyń qyzmetkerleri, memlekettik-jekemenshik áriptestik ortalyǵy men memlekettik organdardyń ókilderi keldi.
«Bir beldeý, bir jol» bastamasynyń jetistikteri boıynsha óz pikirlerimen bólisip, baǵa berý úshin Qytaıdyń tanymal sarapshylary arnaıy kelip otyr. Búgingi sarapshylyq quramymyz bastamany jete talqylaýǵa múmkindik beredi degen oıdamyn. Sharany uıymdastyrýǵa qol ushyn sozǵan Qazaqstandaǵy QHR elshiligine alǵys bildiremin», - dedi dırektorynyń orynbasary Tımýr Shaımerdenov.
«Bul bastama - halyqaralyq arenada tanymal bola tústi. Halyqaralyq qaýymdastyq tarapynan, halyqaralyq sarapshylardan berilgen baǵalar az emes. Ásirese, Qazaqstan Respýblıkasynyń Prezıdenti Nursultan Nazarbaev bastamaǵa birden qoldaý kórsetken edi», - dedi konsýltatsııalyq keńes múshesi, Ulybrıtanııadaǵy Qytaıdyń burynǵy elshisi Ma Chjengan.
Elbasy kitaphanasy taldaý ortalyǵynyń aǵa ǵylymı qyzmetkeri Qazbek Maıgeldınov eki el arasyndaǵy yntymaqtastyqtyń damýy jóninde pikir bildirip, Qytaıdyń negizgi Eýropaǵa jol ashý ekenin basa aıtty.
«Jaqynda ǵana Elbasy taldaý ortalyǵynyń qyzmetkerleri Sıan qalasyna baryp qaıttyq. Sıan qalasy Jibek jolynyń tarıhı bastalǵan jeri ekeni barshaǵa aıan. Bir beldeý, bir jol týraly túrli pikirtalastar ótkizdik. Sondaǵy bizdiń túsingenimiz, Qytaıdyń negizgi maqsaty - Qazaqstandy jaýlap alý emes, Eýropaǵa jol ashý. ıAǵnı, Qazaqstannyń tranzıttik áleýeti Qytaı úshin mańyzdy bolyp otyr. Birinshiden, Qazaqstan arqyly Eýropaǵa jol qysqarady, ekinshiden Qytaıdy Qazaqstandaǵy jaǵdaıdyń turaqtylyǵy qyzyqtyrady. Osy turǵyda Qytaıdyń negizgi kózdegeni tranzıttik áleýet bolsa, bizdiń kózdegenimiz tranzıtti ótkizý arqyly óz jerimizdegi ınfraqurylymdardy damytý», - dep túsindirdi Qazbek Maıgeldınov.
«Bir beldeý, bir jol» birlesken qurylysy aıasynda Qytaı 39 elmen jáne halyqaralyq uıymdarmen 46 yntymaqtastyq týraly kelisimge qol qoıǵan. Bul kelisimder memleketter arasyndaǵy ózara baılanys jáne qatynas, óndiristik qýat, ınvestıtsııalar, ekonomıka jáne saýda, qarjy, ǵylym men tehnıka, qoǵam, mádenıet, teńiz jáne muhıt salalaryndaǵy yntymaqtastyqty qamtıdy.
