Qytaı qazaǵy Toqtarbek Tańathan eki dúrkin olımpıada jeńimpazyn utty

ASTANA. QazAqparat – Tashkent qalasynda erler arasynda ótip jatqan bokstan álem chempıonatynda Qytaı quramasyndaǵy qazaq jigiti Toqtarbek Tańathan sensatsııa jasady, dep habarlaıdy QazAqparat tilshisi.

Toqtarbek Tańathan 80 kelige deıingi salmaqta shırek fınalda eki dúrkin olımpıada jeńimpazy, álem chempıony Arlen Lopespen sheberlik baıqasty.

Toqtarbek ataqty qarsylasynan qaımyqpaı, aılasyn asyra bildi.

Sóıtip, ol jartylaı fınalǵa ótip, júldegerler qataryna ilikti.

Eske sala keteıik, budan buryn Qytaı quramasyndaǵy qazaq boksshysynyń álem chempıonatynda qarsylasyn nokaýtpen utqanyn jazǵan edik.

Sondaı-aq Qazaqstan quramasynan Dýlat Bekbaýov shırek fınalǵa ótti. Al Nurqanat Raıys pen Serik Temirjanov shırek fınalǵa shyǵa almady.

Qarsylasyn eki ret nokdaýnǵa jibergen ulttyq qurama kapıtany Aslanbek Shymbergenov pen Nurbek Oralbaı jartylaı fınalǵa ótti.