Qytaı qaýipti koronavırýsqa qarsy vaktsına jasaýǵa kiristi

BEIJІŃ. QazAqparat – Qytaıdyń Juqpaly aýrýlardy baqylaý jáne aldyn alý ortalyǵynyń ǵalymdary jańa koronavırýsqa qarsy vaktsına daıyndalyp jatqanyn málimdedi, dep habarlaıdy QazAqparat China Daily-ge silteme jasap.

«Ortalyq ǵalymdary vırýsty anyqtap, ekpe jasaýǵa qajetti shtammdy tańdaý jumystaryn júrgizýde», - dedi ortalyq basshysy Sıýı Venbo.

Onyń aıtýynsha, ekpeni zertteý jáne jasaý óte kúrdeli protsess. Vaktsına qoldanysqa daıyn bolý úshin keminde 2-3 jyl qajet.

Al búgin tańerteń Kanadada jańa koronavırýs túrin juqtyrǵan alǵashqy azamat tirkelgeni málim boldy. Fox News málimeti boıynsha, koronavırýs beısenbi kúni Qytaıdyń Ýhan qalasynan Torontoǵa oralǵan 50 jastaǵy er adamnan tabyldy.

Sonymen qatar, vırýsty juqtyrý faktileri osy demalystarda Aýstralııa men Malaızııada da anyqtaldy. Frantsııa ınfektsııaǵa shaldyqqan alǵashqy naýqas juma kúni tirkelgenin málim etken edi.

Yonhap habarlaýynsha, búgin tańerteń Ońtústik Koreıada koronavırýspen úshinshi adam esepke alyndy. 54 jastaǵy naýqas dúısenbi kúni Ýhannan Ońtústik Koreıaǵa oralǵan, qazir karantınde.

Búgin Qytaı jańa koronavırýsty juqtyrǵandar 2 myńnan asyp ketkenin rastady. Qaýipti vırýs elde 56 adamnyń ómirin qıdy.