Qytaı kásipkerleri Pavlodardaǵy arzan elektr energııasyna qyzyǵýshylyq tanytty
ASTANA. QazAqparat - Shansı provıntsııasynyń bıznesmenderimen kezdesý barysynda pavlodarlyq tarap shansımen salystyrǵanda alty esege arzan elektr energııasy men «Pavlodar» arnaıy ekonomıkalyq aýmaǵynda túrli jeńildikter usyndy, dep habarlaıdy pavlodarnews.kz .
Eske sala keteıik, Pavlodar oblysynyń delegatsııasy oblys ákimi Bolat Baqaýovtyń bastamasymen Qytaı Halyq Respýblıkasynda issaparmen júr. Shansı provıntsııasynda "business-to-business" formatyndaǵy kezdesýge jergilikti kásiporyn men qarjy organdarynyń shamamen 30 ókili qatysty. Provıntsııanyń reforma jáne damý komıteti basshysynyń orynbasary Chen Tszeeniń aıtýynsha, Shansı kómir óndirý, elektr energııasyn óńdeý, kokstaý, taý-ken jabdyqtary men kómir-hımııa óndirisinde keshendi jáne biriktiriligen damý úshin kóp kúsh salýda. Ol mashına shyǵarý, qazirgi zamanǵy kómir-hımııa, jańa materıaldar ónerkásibi men arnaıy azyq-túlik óndirisi qarqyndy damýda ekenin atap ótti. Aldyńǵy qatarly jabdyqty júzege asyrý nátıjesinde túsken kiris - 141,8 mıllıard ıýan. Shansı kásiporyndarynyń kirisine keletin bolsaq, kásiporynnyń negizgi qyzmeti shamamen 1,8 trıllıon ıýandy, al kiristen túsken salyqtar 177 mıllıard ıýandy quraıdy. - Bizdiń oblys sizder sııaqty kómir óndirýmen jáne hımııa ónimderin shyǵarýmen aınalysady, - dedi Chen Tszee. - Meniń oıymsha, bizdiń provıntsııa men sizdiń oblys arasynda yntymaqtastyq úshin áleýet bar.
Óz kezeginde Pavlodar oblysynyń ákimi Pavlodar men Shansı munaı-hımııa, kómir-hımııa jáne logıstıka salalarynda jumys isteı alatynyn atap ótti. - Eki óńir de óz memleketterinde kómir óndirýden kóshbasshy bolyp esepteledi, - dedi Bolat Baqaýov. - Degenmen statıstıka kórsetkendeı, sońǵy bes jylda tutyný kólemi 10 paıyzǵa túsip qalǵan. Sondyqtan búgingi tańda kómirdi tereńnen óńdeý máselesi tur. Sizder bul salada belgili bir tájirıbege qol jetkizdińizder. Shansı provıntsııasy kómirdi gazǵa jáne ári qaraı suıyq otynǵa óńdeý tehnologııalaryn sátti qoldanatyny belgili. Biz úshin sizderdiń kompanııalaryńyzdyń tájirıbesi óte mańyzdy.
Budan keıin «Kazakh Invest» kompanııasynyń óńirlik dırektory Oljas Ryskeldi ınvestıtsııalyq tartymdylyq pen Pavlodar oblysynyń eksporttyq áleýeti týraly aıtyp berdi. Kezdesý barysynda óńirdiń múmkindikteri týraly beınefılm kórsetildi.
