Qytaı kallıgrafııasy boıynsha qazaqstandyq stýdentterdiń týyndylary Beıjińdegi kórmede tanystyryldy

BEIJІŃ. QazAqparat – Qytaı astanasynda Shanhaı yntymaqtastyq uıymy (ShYU) elderiniń qatysýshylaryna arnalǵan qytaı kallıgrafııasynyń 4-baıqaýynyń jeńimpazdaryn marapattaý rásimi ótti. Aǵymdaǵy jyldyń 10 aıynda osy sharaǵa 1600 qatysýshydan 2 myńnan astam jumys kelip tústi, dep habarlaıdy «QazAqparat» HAA.

Oǵan Qazaqstan, Qyrǵyzstan, Tájikstan, Ózbekstan, Reseı, Belarýs, Úndistan, Pákistan, Ázerbaıjan, Armenııa, Mońǵolııa jáne basqa elderdiń qylqalam sheberleri qatysty. Olardyń arasynda birinshi oryn alǵan - 4, ekinshi oryn ıelengen - 8 jáne úshinshi oryndy jeńip alǵan 19 jeńimpaz anyqtaldy.

Sondaı- aq «bıylǵy» jáne ótken jylǵy jeńimpazdardyń týyndylary qoıylǵan kórme ótti. Onda Shanhaı qalasyndaǵy Shyǵys Qytaı pedagogıkalyq ýnıversıtetiniń stýdenti DanaToıbaǵarovanyń jumysy erekshe ataldy. Ol 2018 jyly qytaı kallıgrafııasynyń 3-baıqaýynda 1-oryndy jeńip alǵan bolatyn.

Baıqaýdy qytaı mádenıeti men QHR-nyń ShYU memleketteriniń mádenı-gýmanıtarlyq yntymaqtastyǵyn nasıhattaý maqsatynda «Jenmın hýabao» baspasy jáne Qytaı Aqparattyq Internet-ortalyǵy uıymdastyrdy.

Eske sala keteıik, atalǵan baıqaýdyń ótken jylǵy fınalısteriniń qatarynda QHR JOO-da bilim alyp jatqan qazaqstandyq stýdentter - Qanat Omar, Erǵalı Saıanuly, Rýslan Tólenov jáne Madına Balaǵulova bar.

Qytaı kallıgrafııasy - bul mátinniń maǵynasyn ǵana emes, onyń kóńil-kúıin kózben kórsetýge múmkindik beretin ıeroglıftik beıneleý óneri. Hattyń bul túri qaǵazda rýh pen qozǵalys úılesimin kórsetýge, oqyrmannyń nazaryn aýdarýǵa, tipti oǵan emotsııalyq áser berýge arnalǵan erekshe estetıkalyq quramymen erekshelenedi. Shyǵysta kallıgrafııaǵa qashan da erekshe mán bergen. Olar mundaı qyzmet adamnyń adamgershilik qasıetterin joǵary baǵalap tárbıeleýge, sondaı-aq rýhanı damý kezinde oǵan kómektesýge qabiletti dep esepteıdi.

Avtory:

Rýslan Súleımenov