Qytaı KADEX kórmesine qandaı qarý-jaraq alyp keldi
Qytaıdyń soltústik ındýstrıaldy korporatsııasy (NORINCO) kórmege «Tıan Lang 50» zenıtti zymyran kesheni, AR3 pen SR5 dúrkindetip atýdyń reaktıvti júıesi, sondaı-aq, «Qyzyl jebe» zenıtti keshen sııaqty áskerı tehnıkanyń maketterin alyp keldi. Budan bólek, «aýa-jer» úlgisine jatatyn VA-7 zymyrandarmen beınerolıkter arqyly tanysýǵa múmkindik bar.
Búginde NORINCO Qytaıdaǵy qurlyq, shekara, teńiz ben áýe áskerine qarý-jaraq jetkizýshi iri kompanııalardyń qataryna kiredi. Onyń nomenklatýrasynda brondy tehnıka, artıllerııalyq qarý-jaraq, optıkalyq quraldar, radılokatsııalyq qurylǵylar, 5,56 - 750 mm kalıbrli oq-dáriler jáne taǵy basqa áskerı tehnıka bar.
Qytaıdyń ımport-eksport ulttyq kompanııasy (CPMIEC - CHINA NATIONAL PRECISION MACHINERY IMPORT & EXPORT CORPORATION) da áskerı tehnıkanyń birneshe úlgisin alyp keldi. Atalǵan kompanııa áskerı tehnıkamen qatar ǵarysh apparattary men qural-jabdyqtardy jetkizýmen aınalysady.
Al CHINA NATIONAL ELECTRONICS IMPORT & EXPORT CORPORATION (CEIEC) qorǵanys salasyndaǵy elektronıkany jasaıdy. Atalǵan kompanııanyń pavılonynda barlaý, baqylaý, baılanys pen radıoelektronıka quraldarymen tanysýǵa bolady. Budan bólek, CEIEC qoǵamdyq qaýipsizdik jáne kıberqaýipsizdik júıelerin ázirleıdi.
POLY TECHNOLOGIES aqparattyq jaǵynan tolyǵymen qorǵalǵan uıaly telefondardy alyp keldi. Tipti, qaýipsiz SIM-kartalar da bar. «Máselen, qaýipsiz SIM-kartalardy aldymen adamnyń jeke SIM-kartasyna jabystyrý qajet. Sosyn ekeýin de uıaly telefonǵa salady. Osydan keıin arnaıy qosymshany júkteý kerek. Sóıtip, uıaly telefondaǵy barlyq jeke aqparatty barynsha qorǵaýǵa bolady. Al qaýipsiz telefonnyń ishinde jańaǵy SIM-karta da, basqa da qorǵanys elementteri bar. Endi, ondaı qurylǵylardy, kóp jaǵdaıda, arnaıy organdardyń qyzmetkerleri alady. Qarapaıym halyq kóp ala bermeıdi», - deıdi kompanııa basshysynyń Eýropa men Azııa boıynsha orynbasary ıAn Chýnıýı.
CHINA NATIONAL AERO-TECHNOLOGY IMPORT AND EXPORT CORPORATION (CATIC) pavılonynda Qytaıdyń joıǵysh ushaqtarymen tanysýǵa bolady. Sonyń ishinde JF-17, JF-17B, L-15 úlgisindegi ushaqtar bar.
Osy ýaqytqa deıin CATIC 2 myńnan astam ushaqty álemniń 30 eline jetkizgen.
Budan bólek, KADEX kórmesinde CHINA AEROSPACE LONG-MARCH INTERNATIONAL CO., LTD, CETC INTERNATIONAL CO., LTD jáne taǵy basqa qytaılyq kompanııalardyń ónimderi bar.
Aıta keteıik, Astanada V halyqaralyq «KADEX-2018» qarý-jaraq pen áskerı texnıka kórmesi ashyldy. Atalǵan sharanyń ashylý saltanatyna QR Prezıdenti Nursultan Nazarbaev qatysty. Memleket basshysy kórmeniń negizgi ereksheligin atady.
Kórme 26 mamyrǵa deıin jalǵasady. Oǵan Reseı, Belarýs, Qyrǵyzstan, Armenııa, Túrkııa, Iordanııa, Ázerbaıjan, Izraıl, Italııa syndy 40-tan astam elderdiń ókilderi qatysady. Sondaı-aq, Belarýs, Belgııa, Bolgarııa, Brazılııa, Germanııa, Izraıl, Úndistan, Ispanııa, Italııa, QHR, Nıderlandy, RF, AQSh, Serbııa sııaqty álemniń 28 eliniń 318 kásiporyny óz ónimderin usynady. Kórmeniń uıymdastyrýshylary - QR Qorǵanys jáne aeroǵarysh ónerkásibi mınıstrligi, sondaı-aq "Qazaqstan ınjınırıng" UK" AQ.