Qytaı ınjeneri AQSh-ta tyńshylyq jasaǵany úshin 8 jylǵa sottaldy
31 jastaǵy Tszı Chaokýn ótken jyldyń qyrkúıeginde Qytaıdyń Memlekettik qaýipsizdik mınıstrliginiń agenti retinde zańsyz áreketteri jáne AQSh armııasyna jalǵan kýálik bergeni úshin sottalǵan bolatyn.
Ádilet mınıstrliginiń málimetinshe, Tszıge qytaıdyń barlaý qyzmetine AQSh ınjenerleri men ǵalymdary týraly ómirbaıandyq aqparattar jınap, olardy tyńshy retinde tartý tapsyrylǵan bolatyn. Tszı 2016 jyly Illınoıs tehnologııalyq ýnıversıtetin bitirgennen keıin 1 jyldan soń AQSh armııasynyń rezervine qyzmetke alynǵan. Dál osy jaıt onyń Amerıkada jumysqa ornalasýyna múmkindik bergen.
Qyzmetke kirý barysynda bergen ótiniminde Tszı sońǵy 7 jyldyń ishinde sheteldik úkimettermen eshqandaı kelisimsharty bolmaǵandyǵy jaıynda jalǵan málimdeme jasaǵan. Ol sonymen qatar qytaı barlaý qyzmetiniń qyzmetkerlerimen qarym-qatynasyn jasyrǵan.
2018 jyly Tszı Qytaıdyń Memlekettik qaýipsizdik mınıstrliginiń ókiliniń atyn búrkemelegen AQSh quqyq qorǵaý organdarynyń agentimen birneshe ret kezdesken. Kezdesýler barysynda ol áskerı kýáliginiń kómegimen «Rýzvelt» sanatyndaǵy ushaq tasymaldaǵyshqa kirip, sýretke túsire alatyndyǵyn aıtqan. sondaı-aq Tszı AQSh azamattyǵyn alǵannan keıin AQSh-tyń Ortalyq barlaý basqarmasynan, Federaldyq tergeý bıýrosynan nemese NASA-dan jumys izdeıtindigin atap ótken.
Tszı ótken jyly AQSh-tyń birneshe avıatsııalyq jáne aeroǵarysh kompanııalarynyń kommertsııalyq qupııalaryn urlaý maqsatyndaǵy astyrtyn áreketke qatysqany úshin 20 jylǵa sottalǵan Qytaı Memlekettik qaýipsizdik mınıstrliginiń Tszıansý bólimi dırektorynyń orynbasary Sıýı ıAntszıýnıanyń jetekshiligimen jumys istegen. Sıýı Federaldyq tergeý bıýrosynyń tyńǵylyqty jumystarynyń nátıjesinde Belgııada ustalyp, sotqa tartý úshin AQSh-qa ekstradıtsııalanǵan birinshi qytaı tyńshysy edi.
Foto: Liu Jie/Xinhua/Getty Images
