Qytaı ınvestorlary Túrkistan óńirinde maqta sharýashylyǵyn damytýǵa nıetti

TÚRKІSTAN. QazAqparat – Túrkistan oblysynda maqta ósirý úshin Qytaıdyń aýyl sharýashylyǵy tehnologııalary engizilmek. Avtomattandyrylǵan zamanaýı tehnologııa «aq altyndy» egip, terýge deıingi jumysty ózi atqarady, dep habarlaıdy QazAqparat oblys ákimdiginiń baspasóz qyzmetine silteme jasap.

Túrkistan oblysynyń ákimi Darhan Satybaldy qytaılyq «Peng Sheng Group» basshylarymen kezdesti. Kompanııa kórshi Ózbekstan elinde birneshe iri jobalardy sátti júzege asyryp jatyr.

Biregeı jobany oblystyń ońtústik aýdandarynda iske asyrýdy kózdegen qytaılyq ınvestorlar maqta sapasy men kólemi edáýir artatynyna senimdi. Ol úshin tamshylatyp sýarý júıesi qurylǵylary ornatylady.

Joba quny – 46 mıllıon AQSh dollary. Taraptar osy jobany talqylady.

Sondaı-aq kompanııa Túrkistan oblysynda bylǵary óńdeý jáne iri qara mal qaldyqtarynan jelatın óndiretin zaýyt salýǵa daıyn. Bıznes-jospardyń quny – 10 mln AQSh dollary. Sheteldik ınvestorlar ındýstrıaldy aımaqta jumys isteýge nıetti.

Oblys ákimi Memleket basshysy Qasym-Jomart Toqaevtyń aýyl sharýashylyǵy salasyna, qaıta óńdeý isin damytýǵa, jańa óndiristik jobalardy júzege asyrýǵa erekshe basymdyq berip jatqanyn atap ótti. Túrkistan oblysynyń erekshelikterine toqtalyp, jaqynda bolǵan Qytaı sapary nátıjesinde júzege asatyn birlesken jobalar týraly oı qozǵady. Jańa jobalardy jan-jaqty qoldaýǵa, memleket tarapynan kórsetilýi tıis qoldaýlardy usynýǵa ázir ekenin bildirdi.

«Sizderdiń Ózbekstannyń Syrdarııa oblysynda bastaǵan jumystaryńyzben tanysqanmyn. Keremet jobalar iske asyrylǵan. Jaqyn arada biz oblystyń delegatsııasymen Qytaıda jumys saparymen boldyq. Eń iri degen óndiris alpaýyttarynyń jumysymen tanystyq. Tájirıbe aldyq. Endi sony iske asyrýǵa múddelimiz. Oblystyń bes aýdanynyń ákimderi de birer kún buryn Qytaıdaǵy iri óndiris oryndarynda boldy. Osy jumystar nátıjesi retinde búgingi jobalardy jan-jaqty qoldaýǵa daıynbyz», – dedi Túrkistan oblysynyń ákimi Darhan Satybaldy.

Taraptar ınfraqurylymdy damytý jumystaryn talqylady. Oblys basshysy Túrkistan óńirinde júzege asyp jatqan aýqymdy jobalarǵa toqtaldy.

Óz kezeginde qytaı ınvestory Túrkistan óńiri men oblys ortalyǵynyń ekonomıkalyq damý baǵytyn joǵary baǵalap, birqatar jobalarǵa qyzyǵýshylyq tanytty. Birlesken jobalardyń ári qaraı da jalǵasatynyn atap ótti.