Qytaı ınspektsııasy qoı etin óndiretin Qazaqstan kásiporyndaryn tekserýdi bastady
ASTANA. QazAqparat -Qazaqstannyń veterınarlyq júıesine baǵa berý úshin, QR Aýyl sharýashylyǵy mınıstrliginde Qytaıdyń Sapa, tekseris jáne karantındi baqylaý boıynsha Bas basqarmasy (AQSIQ) men Sertıfıkattaý men tirkeý jónindegi Bas basqarmasynyń ókilderimen kezdesý ótti.
Aǵymdaǵy jyldyń 19-27 sáýir aralyǵynda qytaı delegattary Mınıstrlik pen «Atameken» QR UQP jáne Sarapshylar qaýymdastyǵy usynǵan qoı etin óndiretin kásiporyndarǵa tekserý júrgizedi, dep habarlaıdy QR AShM baspasóz qyzmeti.
Arnaıy ınspektsııa qazaqstandyq áriptesterimen birlesip elimizdiń 5 óńirindegi iri et óndirýshi kásiporyndardyń jumysymen tanysýdy josparlap otyr.
Qazirgi ýaqytta, Qytaıdyń STKBBB jáne STBB-na álem boıynsha 100-den asa memleket 10 myńnan asa usynys tastap kezegin kútýde. Alaıda, QR Premer-Mınıstriniń orynbasary - Aýyl sharýashylyǵy mınıstri Asqar Myrzahmetovtiń aǵymdaǵy jyldyń sáýir aıynyń basynda Qytaı Halyq Respýblıkasyna issapary aıasynda jasalǵan kelissózderdiń arqasynda, Qazaqstannan túsken usynystarǵa aıryqsha mán berilip, merzimi jedeldetildi.
Tekserý nátıjesiniń qorytyndysy boıynsha, qazaqstandyq qoı etin qytaı naryǵyna shyǵarýǵa ruqsat berý máselesi qarastyrylady. Sonymen qatar, QHR-ge shyǵarylatyn qoı eti ónimderine qoıylǵan veterınarlyq-sanıtarlyq talaptarǵa sáıkes bolýy sóz bolady.
