Qytaı halqy Jańa jyl merekesin atap ótýde

BEIJІŃ. QazAqparat – Bıyl Aspan asty eliniń basty merekesi - Qytaı Jańa jyly («Chýntsze» kóktem merekesi, aı kúntizbesi boıynsha dástúrli Jańa jyl) 11 aqpannan 12 aqpanǵa qaraǵan túni keldi, dep habarlaıdy QazAqparat tilshisi.

Dástúrge sáıkes, Qytaı Jańa jylyn merekeleýge daıyndyqty bir apta buryn «Kishi Jańa jyl» dep atalatyn ýaqyttan bastaıdy, al merekeniń aldyndaǵy is-sharalar tizbegi qatań túrde kúnder boıynsha josparlanǵan.

Alaıda qazir QHR azamattary bul tártipti ustanbaıdy. Tek «Chýntsze» merekesine deıin úıdi tazalap, jınap, ótip bara jatqan jyldyń sátsizdigimen baılanysty barlyq «qoqystardan» qutylýdy ádetke aınaldyrǵan. Eresekter balalarmen birge terezelerge ilingen qyzyl qaǵaz órnekterin qıyp, úıge kireberis oryndy shamdarmen bezendiredi, jańa jyldyq tilekteri jazylǵan qaǵazdardy úıdiń esikterine ilip qoıady.

Bıyl koronavırýsqa baılanysty Beıjiń ákimshiligi el astanasynyń turǵyndaryn jańa jyldyq merekeler kezinde meıramhanalarǵa barýdan aýlaq bolýǵa shaqyrdy.

Qytaı astanasynyń turǵyndary men qonaqtary úshin demalys aptasy kezinde saıabaqtarǵa, haıýanattar baǵyna jáne basqa da ashyq týrıstik oryndarǵa kirý tegin, sondaı-aq Beıjińniń qala mańyndaǵy aýdandaryna joǵary jyldamdyqty tas joldarmen tegin jol júrý júıesi engizilgen.

Dástúr boıynsha, Qytaı Jańa jyly bastalǵannan keıingi alǵashqy úsh kúnde adamdar basyn jýyp, shashyn qıyp tastaı almaıdy, óıtkeni bul «baılyqtyń joǵalýyn» bildiredi, sonymen qatar dál osyndaı sebeptermen páterdi tazalamaý kerek.

Eske sala keteıik, aı kúntizbesi boıynsha Jańa jyl 12 aqpanda keldi. Qytaıda Jańa jyldy toılaý eki aptaǵa sozylady jáne shamdar merekesimen («ıÝansıatsze») aıaqtalady.

Avtory: Rýslan Súleımenov