Qytaı Google servısterine ishinara tosqaýyl qoıdy
ASTANA. QazAqparat - Qytaıda Google servısteriniń bir bóligine tosqaýyl qoıyldy. Atap aıtqanda, Google -dyń izdeý, sýretterdi qaraý, Gmail elektrondy poshtasynyń servısi syndy barlyq derlik resýrstary oqshaýlandyrylǵan. Sonymen birge, qytaılyq paıdalanýshylarǵa tek qytaılyq domende ǵana emes, gonkong jáne google.fr sııaqty sheteldik nusqalarda da qosylý múmkin bolmaı otyr, dep habarlady RIA «Novostı».
Greatfire.org Google resýrstaryna shekteý qoıylýyn Tıananmen alańyndaǵy oqıǵalardyń jyldyǵymen baılanysty dep sanaıdy. Onda 1989 jyldyń 4 maýsymynda Beıjińde stýdentterdiń sherýin basý kezinde resmı málimetter boıynsha, 200-ge jýyq adam qaza bolyp, 7 myńy jaralandy.
Google óz kezeginde 31 mamyrdan osy kezge deıin onyń Qytaıdaǵy servısteriniń keıbiri ǵana qoljetimdi bolǵanyn atap ótti. Alaıda kompanııa tarapynan eshqandaı tehnıkalyq máseleler bolǵan joq.
Qytaı bıligi men Google arasynda 2010 jyldyń qańtarynda kelispeýshilik oryn alǵan. Onda amerıkandyq kompanııa Qytaı aýmaǵynan onyń Gmail poshtalyq servısine hakerlik shabýyldarǵa súıenip, izdeý nátıjeleriniń mindetti tsenzýrasynan bas tartyp, ózderiniń google.cn qytaı saıtynan google.com.hk gonkong saıtyna paıdalanýshylardyń meken-jaıyn aýystyrǵan.
Maýsym aıynyń sońynda kompanııaǵa meken-jaı aýystyrýdan bas tartýǵa týra keldi. Google lıtsenzııasynyń QHR aýmaǵynda ınternette qyzmet kórsetý merzimi 30 maýsym kúni aıaqtalyp kele jatqasyn, kompanııanyń bas zańgeri Devıd Drammondtyń ótinishine sáıkes, qytaı bıligi sol merzim jaqyndaǵanda lıtsenzııanyń mekenjaı aýystyrýy toqtatylmasa uzartylmaıtynyn alǵa tartty. Nátıjesinde Google kompanııasy QHR-daǵy jumys úshin lıtsenzııany uzartýǵa ótinish joldady. Birqatar ýaqyt ótken soń Qytaı bıligi resmı túrde lıtsenzııanyń uzartylǵany týraly aqparatty qýattady.
