«Qytaı-Eýropa» onlaın temirjol portaly resmı túrde iske qosyldy

Lıanıýngan qalasynda (Qytaıdyń Tszıansý provıntsııasy) bastalǵan temirjol kóligi salasyndaǵy Qytaı-Eýropa yntymaqtastyq forýmynda «Qytaı-Eýropa» onlaın temirjol portaly resmı túrde iske qosyldy, dep habarlaıdy QazAqparat tilshisi.

«Qytaı-Eýropa» onlaın temirjol portaly Qytaı-Eýropa baǵytyndaǵy poıyzdar týraly aqparat almasý úshin ynǵaıly platformany jáne aqparat ıntegratsııasyn qamtamasyz etedi. Qytaı ulttyq temirjol toby ázirlegen veb-saıt qytaılyq jáne sheteldegi tutynýshylar úshin «bir tereze» qaǵıdaty boıynsha keshendi qyzmet usynady. Platforma «Qytaı-Eýropa» jedel júk tasymaly qyzmetteriniń resmı jańalyqtary men statıstıkasyn jarııalaıdy, sondaı-aq syrtqy saýda kásiporyndary men logıstıkalyq platformalar úshin halyqaralyq saýda jáne jetkizý tizbegi qyzmetterin júzege asyrý úshin nusqaýlyq beredi.

Sondaı-aq, onlaın-portal tutynýshylarǵa táýlik boıy dıspetcherlik qyzmet kórsetý, temirjol kóligin saqtandyrý jáne basqa da mamandandyrylǵan qyzmetter usynady.Qytaıdyń statıstıkalyq málimetinshe, Qytaı-Eýropa temirjol baǵyty Eýropanyń 25 elindegi 217 qalany qamtıdy. Osy ýaqytqa deıin poıyzdar onyń boıymen 77 myń ret júrip ótip, eki baǵyt boıynsha jalpy quny 340 mlrrd dollardan asatyn 7,3 mln tonna júk tasymaldaǵan.Forýmda Qytaı bıligi «Qytaı-Eýropa» baǵyty boıynsha júretin konteınerlik poıyzdardyń arqasynda Eýrazııa kontınentinde halyqaralyq tasymaldaýdyń jańa arhıtektýrasy jasalǵanyn, saýda-ekonomıkalyq yntymaqtastyqtyń balamaly alańy qalyptasqanyn, bul óz kezeginde óndiris pen jetkizilimderdiń jahandyq tizbeginiń turaqtylyǵyn senimdi qamtamasyz etýge jáne álemdik ekonomıkanyń damýyna jańa serpin bergenin málimdedi.Qytaı tarapy jahandyq ekonomıkany jandandyrý úshin «Qytaı-Eýropa» ekspresiniń tıimdiligin arttyrý maqsatynda «Jibek joly» rýhynda yntymaqtastyq ornatýdy maqsat etip otyr.Eske sala ketsek, 2014 jyly Lıanıýngandaǵy qazaqstandyq termınal iske qosylǵannan beri qazirgi ýaqytqa deıin 1,6 mln astam konteıner tasymaldanǵan. Termınal Ońtústik-Shyǵys Azııa jáne Azııa-Tynyq muhıty aımaǵy elderinen Qazaqstanǵa, onyń aýmaǵy arqyly Eýropa elderine de, sondaı-aq qarama-qarsy baǵytta da qatynaıtyn júkterdi óńdeýdi qamtamasyz etedi.