Qytaı-Eýropa konteınerlik júk tasymalyn Qazaqstan arqyly ótkizýge kúsh salý kerek - Á. Isekeshev
ASTANA. QazAqparat - Qytaı-Eýropa konteınerlik júk tasymalyn Qazaqstan arqyly ótkizýge kúsh salý kerek. Bul týraly búgin Májiliste Investıtsııalar jáne damý mınıstri Áset Isekeshev málim etti.
Eske salaıyq, jalpy otyrysta «Qazaqstan Respýblıkasynyń keıbir zańnamalyq aktilerine jol-kólik ınfraqurylymyn, kóliktik logıstıkany jáne avıatasymaldy damytý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldanǵan bolatyn. Atalǵan qujat Elbasynyń «100 naqty qadam» Ult josparyn júzege asyrýdy kózdeıdi.
«Zań jobasy aıasynda konteınerlik tasymaldardy damytý sharalary da kózdeledi. Bul rette magıstraldy temirjol jelileri qyzmeti boıynsha konteınerlik tasymaldaýlar máselelerin tabıǵı monopolııalarǵa jatqyzý qarastyrylady. Aıta keterligi, júkterdi konteınermen tasý búgingi tańda kóliktik tasymaldyń eń perspektıvaly túrine aınalyp otyr. Máselen, júk aǵynyń teńiz jolynan temirjol kóligine qaıta baǵdarlanýy esebinen, Qytaı-Eýropa marshrýtynda konteınerlik tasymaldaýdyń qarqyny erekshe údeı túsýde. Endeshe bizdiń maqsatymyz, ondaı tasymaldardyń Qazaqstan arqyly ótýin múmkindiginshe qamtamasyz etý», - dedi Investıtsııalar jáne damý mınıstri Áset Isekeshev.
Mınıstrdiń sózine qaraǵanda, bul joldyń jańa bastalǵanyna qaramastan, ondaǵy progress zor ekeni baıqalýda. Aıtalyq, Qytaıdan Eýropaǵa aǵylǵan osyndaı júk tasymaly aǵymdaǵy jyldyń jeti aıynda byltyrǵyǵa qaraǵanda 3 esege artqan.
