Qytaı elshisi «QazAqparat» HAA bas redaktoryn marapattady
ASTANA. QazAqparat - Halyqaralyq áıelder kúni qarsańynda Astanada Qytaı Halyq Respýblıkasynyń Qazaqstandaǵy elshiligi saltanatty qabyldaý ótkizdi, dep habarlaıdy QazAqparat tilshisi.
Saltanatty keshte QHR Qazaqstandaǵy Tótenshe jáne Ókiletti Elshisi Chjan Hanhýeı Qytaı-Qazaqstan yntymaqtastyǵyna eleýli úles qosyp júrgen qazaqstandyq áıelderdi marapattady.
Marapatqa ıe bolǵan názik jandylar arasynda "QazAqparat" HAA bas redaktory Bıbınor Sultanqyzy Tanelbaeva da bar.
"Kóktemde ózenderdiń muzy erıdi, bar tirshilik jandanady. Al biz aspandaǵy kún tárizdi jarqyraımyz". 1939 jyly tanymal qytaılyq mýzykant, Qytaı men Qazaqstan dostyǵynyń dánekeri bolǵan Sıan Sınhaı 8 naýryzda áıelderdiń sulýlyqqa, bostandyqqa talpynysy týraly dál osylaı ándetip edi. Tarıhqa qarasaq, áıelderdiń jetistikke jetýi arqyly búkil adamzat balasy jetistikke jetken eken. Tóraǵa Sı Tszınpın 2015 jyly Búkilálemdik áıelder sammıtiniń ashylýynda áıelderdiń damýyndaǵy qaryshty qadamdarǵa qarap, olardyń jan-jaqty damýyna qatysty qytaılyq bastamany usynǵan edi", - dep atap ótti dıplomat óziniń quttyqtaý sózinde.
Sonymen birge, saltanatty qabyldaýda QR Aýyl sharýashylyǵy vıtse-mınıstri Gúlmıra Isaeva, Mádenınt jáne sport mınıstrligi Indýstrııa jáne týrızm komıtetiniń tóraıymy Maınura Myrzamádıeva, QR Tuńǵysh Prezıdenti - Elbasy kitaphanasy Qytaı zertteý ortalyǵynyń dırektory Gúlnar Shaımergenova jáne Qazaqstannyń eńbek sińirgen ártisi Maıra Muhamedqyzy QHR Elshisiniń alǵys hatymen marapattaldy.
"Qytaı Halyq Respýblıkasy qurylǵan 68 jyldan beri Qytaı bıligi áıelderdiń múddesi men qyzyǵýshylyǵyn qorǵaýǵa jáne damytýǵa jiti kóńil bólip keledi. Qazirgi ýaqytta Qytaıda áıelderdiń ortasha ómir súrý uzaqtyǵy - 79,4 jyl, joǵary oqý oryndaryndaǵy qyzdardyń úlesi - 52,4%. Áıelder qoǵamdaǵy jumys isteıtin azamattardyń 42,9 protsentin quraıdy. Internet-kásipkerlerdiń 55 protsenti - áıelder. Sońǵy jyldary Qytaıdyń ortalyq memlekettik organdaryna qabyldanatyn áıelderdiń protsenttik qatynasy 51,9 % jetti. Bul Qytaı órkenıeti jetistiginiń dáleli ǵana emes, qytaılyq taraptyń álemdegi teńdikke, beıbitshiliktiń damýyna qosqan úlesi", - deıdi QHR elshisi. 
Sondaı-aq, dıplomat óz sózinde barsha qazaqstandyq áıelderdi kele jatqan merekemen quttyqtady.
"Prezıdent Nursultan Nazarbaev áıel adamdy búrkep ustaýdyń qazaqstandyq dástúrge jat ekenin aıtqan bolatyn. Táýelsizdiktiń 26 jylynda Qazaqstandaǵy áıelderdiń qoǵamdaǵy mańyzy artyp keledi. Qazirgi ýaqytta, qazaqstandyq áıelder eldegi memlekettik qyzmetshiler sanynyń 55,5%-ti qurap otyr. Barlyq analarǵa, áıelderge jáne qyzdarǵa myqty densaýlyq pen máńgi jastyq tileımin. Árbir áıelge mándi ómir men armandarynyń oryndalýyn tileımin. Qytaı men Qazaqstan dostyǵy gúldene bersin!" - dep óz sózin túıindedi elshi Chjan Hanhýeı.
