Qytaı elinde turatyn qandasymyz, belgili aqyn Qurmanbek Zeıtinǵazyuly dúnıeden ozdy

Aıtysker aqyn Qurmanbek Zeıtinqazyuly 1941 jyly QHR Shynjań ólkesi Altaı aımaǵy Shińgil aýdanynda dúnıege kelgen.

Qurmanbek Zeıtinqazyuly Shynjań qazaq ádebıetiniń búgingi aıtys óneriniń kóshin bastaýshy. Burynǵy ótken aqyndarda kóp ushyraıtyn jumbaq aıtys túrin qaıta túletip, keıingi býynǵa ózindik úlgi kórsete bilgen aqyn. Ol ár jyldary qatysqan alaman aıtystarda bas júldeni jıyrma márte jeńip alyp, «Erekshe eńbek sińirgen halyq aqyny», «Halyq aqyny», «Qurmetti aqyn» sekildi ShUAR-dyń joǵarǵy dárejeli marapattaryn enshilegen. Aqyn Іle qazaq avtonomııasy oblystyq aýyz ádebıeti qoǵamynyń, Altaı aımaqtyq ádebıet-kórkemóner qoǵamynyń qurmetti tóraǵasy. Qytaı memlekettik aýyz ádebıeti qoǵamynyń, memlekettik sany az ult jazýshylary ǵylymı qoǵamynyń múshesi.

Aıtys óleńderi ShUAR oqýlyqtaryna kirdi. «Aqyndar aıtysy», «Jylyp ótken jyldar-aı» t.b. jyr jınaqtaryn kópke usyndy. Sonymen qatar aqyn shyǵarmalary jeke kitap bolyp qytaı tiline de aýdarylǵan.

Óner saparymen 1991 jyly Qazaqstanda, 1992 jyly Túrkııada, 1994-1996 jyldary Mońǵolııada, 2006 jyly Germanııa, Frantsııa, Gollandııada bolyp, alystaǵy aǵaıyndar ortasynda jyr tógip, jurttyń alǵysyna bólendi.

Maǵynaly ótse eken ómir degen,

Qur aýnamaı qańbaqtaı jel úrlegen.

Jer besigi denemdi qundaqtasa,

Sóz qalsa eken artymda kómilmegen, - dep jyr tolǵaǵan aqyn maǵynaly ǵumyrynda halqy súıgen, halqyn ónerimen razy-hosh ete bilgen aqyn retinde keńinen tanymal boldy.