Qytaı elge kelgenderge mindetti karantındi alyp tastady
Jańa erejege sáıkes, QHR aýmaǵyna kirý úshin kelerden 48 saǵat buryn tapsyrylǵan, koronavırýstyń joq ekenin dáleldeıtin test nátıjesin kórsetý jetkilikti. Koronavırýs anyqtalmaǵan jaǵdaıda olar Qytaıǵa densaýlyq jaǵdaıy týraly kedendik deklaratsııany toltyrý kezinde QHR-dyń sheteldegi dıplomatııalyq ókildiginen Densaýlyq kodyn suratpaı kire alady. Al PTR-test vırýstyń bar ekenin kórsetse, saparyn jazylǵansha shegere turýdy usynady.
2022 jyldyń jeltoqsanynyń sońynda QHR Densaýlyq saqtaý isteri memlekettik komıteti COVID-19-dy «A» joǵary sanatty ınfektsııalyq aýrýlar tiziminen alyp tastaǵanyn habarlady. Osyǵan baılanysty 8 qańtardan bastap kovıdke qarsy shekteýler men Qytaıǵa kelgen áýe reısteri men jolaýshylarǵa qoıylǵan talaptar, sondaı-aq bir ortalyqqa karantınge jatqyzý men koronavırýstyń bar-joǵyn anyqtaıtyn PTR-test tapsyrý alynyp tastalady.
Qytaı 24, 72 jáne 144 saǵat ishindegi vızasyz tranzıt sharalaryn qalpyna keltirip, elge ýaqytsha kirýge ruqsat beredi.
Sonymen qatar, Qytaı bıligi qurlyqtaǵy shekara beketteri arqyly baılanysýdy qalpyna keltiredi. 8 qańtardan bastap eldiń shekara aımaqtarynda kirýge jáne shyǵýǵa ruqsat qaǵazyn jasaý bastalady.
Oǵan qosa, búginnen bastap QHR azamattarynan shetelge týrıst retinde saparlaý úshin pasport alýǵa ótinish qabyldaý qaıta jandandy.
Qurlyqtyq Qytaı men Gonkong arasyndaǵy qarapaıym jolaýshylar tasymaly da qalpyna keltirildi.
Ótken aptada ondaǵan el Qytaıdan keletin jolaýshylarǵa COVID-19 testin tapsyrýdy engizdi, Beıjiń bul áreketti synǵa aldy. Naqtyraq aıtqanda AQSh, Frantsııa, Aýstralııa, Kanada, Ulybrıtanııa, Japonııa men Indııa Qytaıdan keletin azamattarǵa COVID-19-dy anyqtaıtyn testti jáne basqa da erejelerdi mindettedi. Marokko eń qatań sharalardyń birin qoldandy – Qytaıdan kelgen saıahatshylardyń bárine elge kirýge tyıym saldy.
Buǵan deıin Qytaıda kún saıyn kovıd týraly derekterdi jarııalaýdy toqtatqan bolatyn. Densaýlyq týraly málimet jınaıtyn Airfinity brıtandyq kompanııasynyń zertteýi boıynsha, Qytaıda COVID-ten qaıtys bolǵandar sany kúnine 9 myń adamǵa deıin jetken. Pandemııa bastalǵaly QHR-da 5267 adam koronavırýs saldarynan ómirden ótti.
Qytaı elderdiń epıdemııaǵa qarsy sharalary ǵylymı zertteýge negizdelip, soǵan saı bolý kerek, sondaı-aq adamdar arasyndaǵy qalypty almasý protsesi men seriktestikke áser etpeýi kerek dep esepteıdi. Bul týraly QHR Syrtqy ister mınıstrliginiń resmı ókili Mao Nın málimdedi. Qytaıdan kelgen azamattarǵa kúsheıtilgen jáne shekteý sharalaryn engizý Qazaqstannyń josparynda joq.
Ashyq kózderden alynǵan foto
