Qytaı ekonomıkasynyń ahýaly bútin álem úshin mańyzdy – Ulttyq bank
ALMATY. QazAqparat – QR Ulttyq bank tóraǵasy Erbolat Dosaev búgin Almatyda ótken baspasóz máslıhaty barysynda Qytaı ekonomıkasy álemdik ekonomıkaǵa qanshalyqty yqpaly etetindigin aıtty, dep habarlaıdy QazAqparat tilshisi.
«Bıyl Úkimet, Ulttyq bank jáne jańa agenttik arasynda jumysty úılestirý boıynsha kelisim jasalady. Kóktemde Memleket basshysynyń eskertýlerin eskere otyryp, mejelengen maqsatqa jetý úshin barlyq shara qoldanylatyn bolady. Basty syn-qaterler jaıly jyldyń basynda aıtylǵan bolatyn. Qazaqstan ekonomıkasynyń qurylymy áli de shıkizat saýdasy bolyp tur. Baǵalardyń turaqsyzdyǵy osydan shyǵyp jatyr. Endi, bıylǵy basty syn-qater Qytaı ekonomıkasynyń ahýalynan bolmaq», - dedi E.Dosaev.
Ulttyq bank basshysynyń aıtýynsha, Qazaqstannyń Eýroodaq, Reseı, Qytaı sııaqty 3 iri seriktesi bar. Olar Qazaqstan taýary, shıkizaty satylatyn negizgi naryqtar bolyp tabylady.
«Qytaı ekonomıkasynyń ahýaly Qazaqstan úshin ǵana emes, barlyq álemge mańyzdy. Naryqtaǵy qaýesetter árdaıym qandaı da bir ózgeris engizip otyrady. Azııa bırjalary ashylǵannan keıin 8 paıyzǵa quldyrap ketti. Meniń oıymsha, kórshimizdiń jaı-kúıin muqııat baqylaýǵa alý kerek. Soǵan sáıkes aqsha nesıe boıynsha is áreket jasaý qajet», - dedi ol.
