Qytaı dúkenderinde saýda jasaǵan týrısterge salyqtyq tólemder qaıtarylyp berilmek
ASTANA. QazAqparat - Qytaı Halyq Respýblıkasynyń qarjy mınıstrligi osy elge kelgen sheteldik azamattar saýda jasaǵan jaǵdaıda olarǵa salyqtyq tólemderdi qaıtaryp berý týraly qaýlyny jarııa etti, dep habarlaıdy sheteldik BAQ.
Endi Qytaı dúkenderinde saýda jasamaq bolǵan sheteldik týrıster osy elde jumsaǵan qarajatynan 11% kólemindegi salyq tólemin qaıtaryp ala alady. Bul jańashyldyq bir dúkende 500 ıýannan ($81) artyq somaǵa saýda jasaǵanda qoldanylady. Salyq tólemderi QHR aýmaǵynda 183 kúnnen artyq bolmaıtyn týrısterge qaıtarylady.
Salyqty qaıtarý kıim, aıaq kıim, kosmetıka ónimderi, saǵattar, zergerlik buıymdar, elektronıka, keńse zattary jáne sporttyq taýarlar men medıtsınalyq quraldardy jáne jıhazdar satyp alǵan kezde 90 táýlik ishinde júzege asyrylady.
Eger týrıstiń satyp alǵan taýarlarynyń quny 10 000 ıýannan (shamamen $1610) aspaıtyn bolsa, onda týrıst salyqtyq qaıtarymdy qolma-qol aqsha túrinde nemese banktegi esepshotyna aýdarý arqyly ala alady. Eger satyp alynǵan taýarlarynyń quny 10 000 ıýannan asyp ketetin bolsa, onda mundaı tólemdi qaıtarý tek banktegi esepshot arqyly júzege asyrylady.
Bul sheshim eldegi salyq júıesin ońtaılandyrý jáne týrızmdi damytý maqsatynda qabyldanyp otyr.
