Qytaı depýtattary 2015 jyly eldi damytý josparyn qabyldady
BEIJІŃ. QazAqparat - Jeksenbi kúni Búkilqytaılyq halyq ókilderi jınalysynyń 5 naýryzda ashylǵan jyl saıynǵy sessııasy óz jumysyn aıaqtady.
Qytaılyq zań shyǵarýshylar sessııa jumysynyń birinshi kúninde QHR Memlekettik keńesiniń Premeri Lı Ketsıan málimdeme jasaǵan Úkimet jumysynyń eseptik baıandamasy boıynsha qarar qabyldady. Depýtattar úkimettiń jumysyn maquldap, 12-shi besjyldyqtyń sońǵy 2015 jylǵy eldi ekonomıkalyq jáne áleýmettik damytý josparyn qabyldady.
Sessııa jabylar aldynda zań shyǵarýshylar 2015 jylǵy memlekettik bıýdjetti de qabyldap, Búkilqytaılyq halyq ókilderi jınalysy turaqty komıtetiniń, Joǵarǵy sot pen Bas prokýratýranyń jumysyn maquldady, zań shyǵarýshylyq týraly zańǵa ózgerister engizdi, sondaı-aq Búkilqytaılyq halyq ókilderi jınalysy turaqty komıtetiniń kadrlyq quramy boıynsha sheshimder qabyldady.
Sessııa aıaqtalǵan soń Lı Ketsıanniń baspasóz máslıhaty bolyp ótti. Ol qytaılyq jáne sheteldik tilshilerdiń 17 suraǵyna jaýap berdi. «QazAqparat» nazaryńyzǵa onyń bergen jaýaptarynyń negizgi tezısterin usynady:
- 2015 jyly Qytaıdyń bılik kózderi JІÓ-niń 7 paıyz deńgeıindegi ósimin qoldaıdy;
- Qytaı Úkimeti Gonkongqa qatysty saıasatyn qatańdatpaıdy;
- Úkimet bala týýdy josparlaý saıasatynyń bolýy múmkin jumsartý máselesin zertteý ústinde;
- Qytaı basshylyǵy jemqorlyqpen kúresin jalǵastyrýdy kózdep otyr;
- Bıylǵy jyldyń qańtar aıynda QHR-dyń kúshine engen qorshaǵan ortany qorǵaý týraly zańy qatań túrde oryndalatyn bolady. Lastaıtyn qaldyqtardy zańsyz tastaıtyn kásiporyndar jazaǵa ushyraıdy;
- qytaılyq úkimet ekonomıkalyq ósimniń báseńdeýi jaǵdaıynda naryqty jandandyrý maqsatymen kásipkerliktegi «bógetterdi joıyp, jol salýdy» jalǵastyrady. Bıznesti bastaýda sońǵy 2 jylda úshten bir bólikke qysqartylǵan ruqsat berý protsedýralary jeńildetiledi. Bul kásipkerler men sharýashylyq sýbektilerdiń sanyn 50 paıyzǵa kóbeıtýge múmkindik berdi;
- Beıjiń reformalaryn jalǵastyrady, sonyń ishinde Qytaı álsiz damyǵan aýdandardaǵy áleýmettik turǵyn úılerdiń qurylysyn 1 mln. birlikke deıin arttyrady; - Qytaı men AQSh-tyń saýda-ekonomıkalyq baılanystary odan da tyǵyz bolýy múmkin, oǵan QHR tóraǵasy Sı Tszınpınniń aldaǵy ýaqytta AQSh-qa jasaǵan sapary septigin tıgizbekshi;
- Qytaı Ýkraına máselesinde obektıvti jáne ádil pozıtsııany ustanyp, bul eldiń táýelsizdigin, egemendigi men aımaqtyq tutastyǵyn qurmetteıdi;
- Ekinshi dúnıejúzilik soǵystaǵy Jeńistiń 70 jyldyǵynda qytaılyq-japondyq qatynastar aldynda «synaqtar da, múmkindikter de» tur.
