Qytaı dárileri óli týǵan náresteniń aǵzasynan jasalatyn kórinedi

Agenttiktiń habarlaýynsha, Koreıanyń Seýl áýejaıynda quramyna adam aǵzasy engizilgen iri kólemdegi qytaı dári-dármekteri ustalǵan.

Ótken jyldyń tamyz aıynan bastap ońtústikkoreıalyq kedenshiler Qytaıdyń osyndaı 17 myńnan astam kontrabandalyq dárilerin tárkilegen. Mundaı sumdyq jaı nebir quıtyrqy dúnıelerdi kórip júrgen kedenshilerdiń ózin de tańǵaldyrypty.

Kópshilik suranysyna ıe bolǵan bul kapsýlalar «barlyq aýrýlarǵa arnalǵan dári», sondaı-aq jalpy kúsh-qýatty arttyrýǵa arnalǵan qural retinde paıdalanylady eken. Preparatty Qytaıda zańsyz túrde, óli týylǵan náresteni shıkizat retinde paıdalaný arqyly jasaıtyn kórinedi. Alypsatarlar kishkentaı óli denelerdi turmystyq tońazytqyshta saqtap, sosyn kádimgi peshte keptiredi de, untaqtaıdy. Tekserýshi organdar kapsýlanyń shynaıy quramynda ne bar ekenin bilip qoımas úshin úgitilgen untaqty dárilik shóptermen aralastyryp jiberedi eken.

San Francisco Times basylymy keltirgen zertteýlerge qaraǵanda, Seýlde ustalǵan dárilerdiń 99,7% paıyzy adam aǵzalarynan jasalǵan. Al álemde qytaıdyń dástúrli medıtsınasynyń preparattaryna degen suranystyń artyp otyrǵany jasyryn emes. Óıtkeni qytaılyq dárilerden aýrýdan jyldam aıyǵýǵa bolady dep sanaıdy. Bárinen de soraqysy, qytaılyqtar dári-dármek retinde sharananyń «joldasyn» paıdalanady eken. Olardyń pikirinshe, bul qanaınalymynyń jaqsarýyna yqpal etedi. Al azııalyq memleketterdiń densaýlyq saqtaý organdary atalǵan dári-dármekter ınternette satylymǵa túsip ketpese eken dep alańdaýda.

Iá, qytaılardan nebir soraqy dúnıelerdi kútýge bolady. Qaıbir jyldary aıaqkıimderi men balalar oıynshyqtarynan ýly hımıkattar shyǵyp, eldi bir ábigerge túsirgeni bar edi. Al mynadan keıin qytaı dárilerin paıdalanýdyń ózi zııandy ekenine shúbáńiz bolmasyn. Aýrýyńyzǵa daýa izdep, qytaılyq dári satyp alyp, adam aǵzasyn iship júrmegenińizge kim kepil?!