Qytaı dárigerleriniń onlaın trenıngine 700-ge jýyq medqyzmetker qatysty
ALMATY. QazAqparat – Almatyda koronavırýspen kúres tásilderin úıretý úshin Qytaıdan kelgen delegatsııanyń onlaın trenıngin 700-ge jýyq medıtsına qyzmetkeri tyńdady, dep habarlaıdy QazAqparat tilshisi.
Qytaılyq dárigerlerdiń koronavırýs týraly onlaın sabaǵyna qatysý - tegin. Bul sabaqtar tek qazaqstandyq qana emes, sheteldik mamandardyń da qyzyǵýshylyǵyn týdyryp otyr.
Búgin semınarǵa Ózbekstannan Samarqan men Buharanyń dárigerleri de qatysty.
«Eń aldymen osyndaı kezdesý týraly ýaǵdalastyqqa qol jetkizgen Memleket basshysy Qasym-Jomart Toqaevqa alǵys aıtamyn. Buryn-sońdy kórmegen ınfektsııamen kúreste bul mamandardyń kelýi bizdiń mindetterimizdi aıqyndady. Eń aldymen medıtsına mamandary bul vırýspen kúresýde bilimin keńeıtkeni jón. Sabaqqa qatysqan dárigerlerdiń saýaly óte kóp. Qytaı bul vırýsty az ýaqytta toqtata bildi. Sondyqtan olardyń tájirıbesi, bilimi biz úshin mańyzdy», - dedi S.Asfendııarov atyndaǵy Qazaq Ulttyq medıtsınalyq ýnıversıtetiniń rektory Talǵat Nurǵojın.
Sabaqtar tek emdeý men dıagnostıka salasyna ǵana qatysty bolǵan joq. Sonymen qatar, Shyńjań okrýgindegi dostyq gospıtaliniń aǵa medbıkesi ıÝ ıAnsıa ınfektsııalyq statsıonardy zararasyzdandyrý tásilderimen bólisti.
«Oqshaýlaýdyń basty sharty - «1 naýqas – 1 palata». Biz aýrýhanalardy 3 tıpke bóldik. Jasyl - taza aımaq, sary - jartylaı taza aımaq, qyzyl - juqtyrý aımaǵy. Bul aımaqtardyń árqaısysyn ózinshe tazalaıtynbyz. Orta eseppen kúnine 2 ret zararsyzdandyratynbyz. Aýany, qabyrǵalardy, eden men qural-jabdyqtardy dezınfektsııaladyq. Tolyq zararsyzdandyrýǵa 30 mınýt ýaqyt ketedi. Dezınfektsııadan shyqqan soń barlyq materıaldar joıylady», - dedi aǵa medbıke ıÝ ıAnsıa.
Sonymen qatar ol qorǵanys kostıýmderin kııý, maska taǵý, qoldy qalaı jýý kerektigin kórsetti.
Aıta ketý kerek, búgin Almatyǵa Qytaıdan 10 maman Covid-19-ben kúres týraly bilimimen bólisýge keldi. Delegatsııa quramynda ınfektsıonıst, epıdemıolog, pýlmonolog jáne basqa da mamandar bar.
