Qytaı dárigerleri qazaqstandyq áriptesterine trenıng pen semınar ótkizdi
Meımandar búgin Ulttyq ǵylymı kardıohırýrgııa ortalyǵy men «Ramada Plaza» qonaq úıinde boldy. Odan bólek, ıntensıvti terapııa dárigerlerine onlaın rejımde trenıng ótkizdi. Trenıngtiń negizgi taqyryby – dene qyzýy joǵary naýqastardy tekserý protsedýrasy, dıagnozy naqtylanǵan patsıentti ınfektsıonıst Lý Sıaobo usynǵan ádispen emdeý, sonymen qatar reanımatolog Chjang Dachýannyń jansaqtaý bóliminde jatqan jaǵdaıy aýyr naýqastardy emdeý tásili.
Trenıngke densaýlyq saqtaý salasyndaǵy 483 maman qatysty. Dáris aıaqtalǵan soń qazaqstandyq dárigerler kókeıdegi suraqtaryn qoıyp, jaýap aldy.
Osy kúni qytaılyq dárigerler vıdeokonferentsııa arqyly koronavırýs ınfektsııasyna shaldyqqandardy emdep júrgen qazaqstandyq dárigerlerge eki saǵattyq semınar ótkizdi. Onda mańyzdy eki taqyryp qaraldy: reanımatolog Sıý Mınniń ádisimen hali nashar naýqastarǵa dıagnoz qoıý jáne emdeý, sondaı-aq pýlmonolog Chjý ıÝlýn usynǵan tásil boıynsha naýqasqa kompıýterlik tomografııa arqyly dıagnoz qoıý. Semınarǵa 333 dáriger qatysty.
Keshkisin Qytaıdan kelgen mamandar Qazaqstannyń óńir-óńirindegi qoǵamdyq densaýlyq saqtaý basqarmalarynyń qatysýymen onlaın kezdesý ótkizip, COVID-19 ınfektsııasyn talqylady. Іle-Qazaq avtonomdy okrýgi gýbernatorynyń orynbasary Ershat Tursynbaı men nefrolog dáriger Lý Chen ulttyq jáne mýnıtsıpaldyq deńgeıde koronavırýstyń aldyn alý men baqylaýda ustaýdyń qytaılyq mehanızmin tanystyrdy.
Aıta keteıik, mundaı trenıngter men semınarlar aldaǵy ýaqytta kún saıyn ótkiziledi. Densaýlyq saqtaý mınıstrligi koronavırýspen kúresip júrgen qazaqstandyq dárigerlerdi osy sharalarǵa qatysyp, tájirıbe almasýǵa shaqyrady.
