Qytaı dárigerleri Qazaqstandaǵy mıssııasyn aıaqtap, eline oraldy

NUR-SULTAN. QazAqparat - Qytaı dárigerleri Qazaqstandaǵy jumysyn aıaqtap, úılerine oraldy. Medıtsına qyzmetkerlerin Qytaıǵa Qazaqstan Áskerı áýe kúshteri áskerı-transporttyq avıatsııa jetkizdi, dep habarlaıdy Qorǵanys mınıstrliginiń baspasóz qyzmeti.

10 dárigerden quralǵan toptyń elimizge sapary 9 sáýirde bastalǵan bolatyn. Resmı sapar 15 kúnge sozyldy. Osy ýaqyt ishinde Qytaı mamandary medıtsınalyq mekemelerge baryp, semınarlar, trenıngter men konferentsııalar ótkizdi. Qazaqstandyq áriptesterimen koronavırýs ınfektsııasynyń aldyn alý men COVID-19-ben aýyratyn naýqastardy emdeý, ınfektsııany juqtyrǵan adamdardy anyqtaý algorıtmi men olardy oqshaýlaý, epıdemıologııalyq zertteý ádisteri, medıtsınalyq personaldyń dıagnostıkadan ótýi men olardyń ınfektsııany juqtyrýyna jol bermeý jóninde tájirıbesin bólisken bolatyn.

Atalǵan sharalarǵa áskerı dárigerler de qatysqan bolatyn. Qazirgi tańda áskerı medıtsınalyq personal koronavırýspen aýyratyn naýqastardy emdeý jáne qaýipti ınfektsııamen kúreste qajetti kómek kórsetip júr.