Qytaı dárigerleri gemofılııa derti bar naýqastarǵa operatsııa jasaýda qazaqstandyq tájirıbeni qoldanbaq
ASTANA. QazAqparat - Qytaı dárigerleri qazaqstandyq áriptesterin gemofılııa derti bar naýqastarǵa operatsııa jasaý tájirıbesimen bólisýdi surap otyr.
Bul týraly búgin Aqordada Medıtsına qyzmetkerleri kúni qarsańynda QR Memlekettik hatshysy Gúlshara Ábdiqalyqovamen kezdesý aldynda Astanadaǵy №1 qalalyq aýrýhanasynyń ınnovatsııalyq baǵyttaǵy dárigeri Ersin Júnisov málim etti.
«Osyǵan deıin Ortalyq Azııa men TMD elderinde bolmaǵan emdeý tehnologııalaryna qol jetkizdik. Onyń ishinde birinshi qalalyq aýrýhanada 80-nen astam ınnovatsııalyq tehnologııalar engizildi. Atap aıtqanda, osy tehnologııalar keńinen júzege asyrylýy úshin tıisti ortalyqtar quryldy. Bul baǵytta ınsýlt ortalyǵy, lor jáne basqa da ortalyqtar jasaqtaldy. Nátıje bar, ıaǵnı buryn ınsýltpen kelip túsken naýqastar ókinishke qaraı reanımatsııa bólimine jatqyzylatyn nemese múgedek bolyp qalatyn. Qazir erte kezeńde jasalatyn operatsııalardyń arqasynda ınsýltten keıingi ólim men múgedektiktiń deńgeıi 2-3 esege tómendedi. Derti asqynǵan naýqastardy aman alyp qalýǵa shamamyz kelip jatyr»,-dedi dáriger.
Onyń sózine qaraǵanda, búginde ortopedııa men travmatologııada Qazaqstan TMD jáne Azııa elderi arasynda birinshi bolyp gemofılııa (qannyń uıýynyń nasharlyǵynan qan toqtamaý), tirek-qozǵalys júıesiniń keseldi isigi sekildi indetteri bar naýqastardy emdeý tehnologııasyn engizdi. Buryndary osyndaı dertteri anyqtalǵandar sheteldik klınıkalardyń kómegine júginetin nemese olarǵa operatsııa jasalmaıtyn. Sońǵy 10-15 jylda bul problema ońtaıly sheshimin taýyp otyr.
«Osy turǵyda biz 15-20 shilde aralyǵynda Beıjińdegi Azııalyq kongreske baramyz. Onda bizdiń áriptester gemofılııa dertine shaldyqqan naýqastardy emdeýdiń tehnologııasyn engizý tájirıbesimen bólisýdi surap otyr. Osyndaı syrqaty bar adamdardyń operatsııadan keıin ólim-jitimi óte joǵary bolǵandyqtan, olar qazir bundaı dertpen kelgen emdelýshilerge operatsııa jasamaýda. Sońǵy eki jylda olar bizdiń tehnologııalarǵa qyzyǵýshylyq tanytýda, sondaı-aq bizdiń tájirıbeni úırený úshin jıi kelip júr. Osy jolǵy saparymyzda birlesken operatsııalardy ótkizýimiz yqtımal»,-dedi E. Júnisov.
