Qytaı bıznesmenderi Aqmolada óndiriletin sýǵa qyzyǵýshylyq tanytyp otyr
KÓKShETAÝ. QazAqparat - Qytaı bıznesmenderi Aqmola óńirinde óndiriletin mıneraldy sýǵa qyzyǵýshylyq tanytyp otyr. Bul týraly Aqmola oblysynyń ákimi Málik Myrzalın óńirdiń 2017 jylǵy áleýmettik-ekonomıkalyq damý qorytyndylary men aldaǵy jylǵy mindetteri týraly turǵyndar aldynda ótken eseptik kezdesýinde aıtty, dep habarlaıdy QazAqparat tilshisi.
Aımaq basshysy, Elbasy Nursultan Nazarbaevtyń tapsyrmasyn oryndaýda aýyl sharýashylyǵy jáne daıyn ónimi eksporty, sondaı-aq, Astana qalasy aınalasynda azyq-túlik beldeýin damytý boıynsha Aqmola oblysyna úlken jaýapkershilik júktelip otyrǵandyǵyn atap ótti.
«Biz joǵary sapaly azyq-túlik ónimderin shyǵaratyn óńir retinde oblystyń mártebesin arttyrýymyz kerek. Búgingi tańda brend ónimderine ishki naryqta ǵana emes, syrtta da suranys joǵary kásiporyndar bar. Jalpy, oblysta et, sút, jumyrtqa, ósimdik maıyn, balmuzdaq jáne un ónimderin óńirlik brendpen saýdaǵa 80 eksporttaýshy kompanııa bar.
Meniń jumys saparym barysynda qytaı bıznesmenderi «Kókshetaý mıneraldy sýlary» AQ ónimderine qyzyǵýshylyq tanytyp, óz elderiniń Gonkong jáne Gýandýn ońtústik provıntsııasynda saýda-sattyq boıynsha áriptes bolýǵa nıet tanytty», - dedi oblys ákimi.
Eske sala keteıik, 2017 jyldyń 11 aıynda Aqmola oblysynyń syrtqy saýda aınalymynyń kólemi 800,5 mıllıon AQSh dollaryn qurady, eksport - 295,2 mıllıon AQSh dollar, 31,7 paıyzdan astamy, ıaǵnı 93,6 mıllıon AQSh dollary óńdelgen taýarlar eksportyna keledi.
Eksporttyń basty baǵyttary - Reseı Federatsııasy jáne basqa da taıaý shetelder.
Bıdaı eksporty kólemi 4,3 paıyzǵa, arpa 82,7 paıyzǵa, podshıpnıkter 46,5 paıyzǵa ósti. Oblystyń dástúrli eksport ónimderi qataryn quraýshy ósimdik ónimderi bolyp tabylady - kúnbaǵys tuqymynyń eksporty 2,1 esege ósti, rapstyń tuqymy - 1,3 esege.
Aqmola oblysy kásiporyndarynyń azyq-túlik ónimderin taratý maqsatynda, Reseı Federatsııasynyń shekaralas ornalasqan óńirleriniń dúkender júıesinde olardy satý máselesi qarastyrylýda.
