Qytaı «Bir beldeý, bir jol» elderine 11 mlrd astam qarajat bóledi
BEIJІŃ. QazAparat - «Bir beldeý, bir jol» strategııasy aıasynda halyqaralyq yntymaqtastyq boıynsha joǵary deńgeıdegi forýmnyń ashylýynda QHR Tóraǵasy Sı Tszınpın damýshy elderge gmanıtarlyq kómek retinde shamamen 11 mlrd dollardan asatyn qarajat bólý jospary jaıly aıtty, dep habarlady Qytaıdaǵy «QazAqparat» HAA tilshisi.
«Aldaǵy úsh jylda Qytaı aýqymdy joba kólemin iske qosý jáne halyqtardyń jaqsy ómirin qamtamasyz etý úshin «Bir beldeý, bir jol» bastamasyna qatysatyn halyqaralyq uıymdarǵa jáne damýshy elderge 60 mlrd ıýan (8,8 mlrd dollar) kómek kórsetedi. Qytaı Jibek joly boıyndaǵy elderge 2 mlrd ıýan (shamamen 294 mln dollar) azyq-túlik kómegin kórsetedi, «Ońtústik-Ońtústik» jelisi boıynsha yntymaqtastyq úshin kómek qoryna 1 mlrd dollar qosymsha qarjy bóledi», - dedi ol.
Onyń aıtýynsha, QHR «Baqytty úı» 100 jobasyn, kedeılikti joıý boıynsha 100 joba jáne «Bir beldeý, bir jol» boıyndaǵy elderde densaýlyq saqtaý jáne saýyqtyrý boıynsha 100 jobany iske qosady.
«Qytaı tıisti halyqaralyq uıymdarǵa «Bir beldeý, bir jol» boıyndaǵy elderge tabys ákeletin jobalardy iske asyrýǵa 1 mlrd dollar beredi», dep atap ótti qytaılyq kóshbasshy.
Eske salsaq , forýmǵa 29 memleket jáne 3 halyqaralyq uıym (BUU, Dúnıejúzilik bank, Halyqaralyq valıýta qory) basshylarymen birge Qazaqstan Prezıdenti N. Nazarbaev qatysýda.
