Qytaı bıligi maımyl shesheginiń taralýynyń aldyn alý jumystaryn kúsheıtti

BEIJІŃ. QazAqparat - Qytaı Halyq Respýblıkasynyń Memlekettik gıgıena jáne densaýlyq saqtaý komıteti maımyl shesheginiń emi boıynsha nusqaýlyq qurastyrdy, ol osy ınfektsııany erte dıagnostıkalaýǵa jáne standarttalǵan emdeýge baǵyttalǵan. Tıisti qujat agenttik saıtynda jarııalandy, dep habarlaıdy QazAqparat tilshisi.

Qujatta eldegi barlyq aımaqtyq bılik maımyl indetin dıagnostıkalaý men emdeýge baılanysty oqytý kýrstaryn uıymdastyrýy kerektigi atap ótilgen.

«Maımyl sheshegin juqtyrý jaǵdaılaryn der kezinde anyqtaý, bul týraly hattamaǵa sáıkes habarlaý jáne juqtyrǵandarǵa medıtsınalyq kómek kórsetý daǵdylaryn jetildirý qajet», - delingen vedomstvo qujatynda.

Sonymen qatar, dástúrli qytaı medıtsınasynyń múmkindikterin osy vırýstyq ınfektsııanyń aldyn-alý jáne emdeýde qoldaný usynylady.