Qytaı bıligi qysqy Olımpıada oıyndary kezinde tsıfrlyq ıýandy synaqtan ótkizedi

BOAO. QazAqparat – Aldaǵy Beıjińde ótetin qysqy Olımpıada oıyndary kezinde biz sheteldik azamattarǵa tsıfrlyq ıýange qol jetkizýdi qamtamasyz etemiz. Boao azııalyq forýmyndaǵy sessııalardyń birinde Qytaı Halyq banki (QUB, Ortalyq bank) basshysynyń orynbasary Lı Bo osyndaı málimdeme jasady, dep habarlaıdy QazAqparat menshikti tilshisi.

«Biz tsıfrlyq ıýandi paıdalanýdyń pılottyq jobalary úshin kóbirek stsenarıı men kóptegen qalany qarastyramyz. Beıjińdegi qysqy Olımpıada oıyndary kezinde biz oǵan shetel azamattarynyń qol jetkizýin qamtamasyz etemiz», - dep atap ótti Lı Bo.

«Tsıfrlyq ıýandy ilgeriletý áreketteri ishki paıdalanýǵa baǵyttalǵan. Sandyq ıýandy ınternatsıonaldandyrý týraly aıtatyn bolsaq, biz bul tabıǵı protsess ekenin jáne bizdiń maqsatymyz basqa halyqaralyq valıýtalardy almastyrý emes ekenin birneshe ret aıtqan bolatynbyz. Bizdiń maqsatymyz – naryqqa tańdaý jasaýǵa múmkindik berý», - dedi ol.

Sondaı-aq Lı Bo Qytaı tsıfrlyq ıýan men ekojúıeniń ınfraqurylymyn, onyń ishinde tehnologııany odan ári damytyp, qaýipsizdik pen senimdilikti arttyryp, ony qoldaný úshin tıisti normatıvtik-quqyqtyq bazany jasaýy kerek ekenin habarlady.

Onyń aıtýynsha, tsıfrlyq ıýandi odan ári ınternatsıonaldandyrý turǵysynan Qytaı halyqaralyq seriktestermen transshekaralyq tólemder boıynsha uzaq merzimdi sheshim jasaý úshin jumys isteıtin bolady.

Ótken jyldyń qazan aıynan bastap Qytaıdyń Ortalyq banki eldiń birneshe aımaǵynda, atap aıtqanda Beıjiń, Shenchjen, Sýchjoý jáne Chendý qalalarynda tsıfrlyq ıýandy synaqtan ótkizdi.

Eske sala keteıik, Beıjińdegi qysqy Olımpıada oıyndary 2022 jyldyń 4-22 aqpan aralyǵynda ótedi.

Avtory: Rýslan Súleımenov