Qytaı bıligi aldaǵy bes jylda zeınetke shyǵý jasyn uzartýdy josparlap otyr

BEIJІŃ. QazAqparat – Aldaǵy bes jyl ishinde Qytaı bıligi zeınetke shyǵý jasyn birtindep kóbeıtýdi josparlap otyr. Bul týraly juma kúni ashylǵan 13-shaqyrylymnyń halyq ókilderi jalpyqytaılyq jıynynyń 4-sessııasy depýtattarynyń qaraýynda jatqan úkimettiń baıandamasynda aıtylǵan, dep habarlaıdy QazAqparattyń menshikti tilshisi.

«Halyqtyń qartaıýyna nazar aýdartatyn memlekettik strategııany iske asyrý, qart adamdar men jas balalarǵa basymdyq bere otyryp, demografııalyq damý qyzmetteriniń júıesin jetildirý, bala týýdyń qalypty deńgeıine qol jetkizýge járdemdesý, zańda belgilengen zeınetaqy jasyn birtindep arttyrý», - delingen baıandamada.

Qurlyqtyq Qytaı turǵyndarynyń sany 2019 jyldyń sońynda 1,4 mlrd adamnan asqanymen, Ulttyq statıstıka bıýrosynyń málimetinshe, QHR-daǵy bala týý koeffıtsıenti tómengi shektik mánnen 1.5-ke tómendep ketken.

Qazirgi ýaqytta Qytaıda ortasha zeınetke shyǵý jasy 55-ten tómen.

QHR-nyń «mı ortalyqtarynyń» boljamyna sáıkes, 65 jastan asqan qart adamdar 2035 jylǵa qaraı Qytaı halqynyń jalpy sanynyń 21%-yn jáne 2046 jylǵa qaraı 25%-yn quraıdy. Aldaǵy 30 jylda Qytaıdyń egde jastaǵy halqy 193 mıllıon adamǵa artady, al eńbekke qabiletti halyq, eldegi týý deńgeıiniń tómendigine baılanysty, 176 mıllıon adamǵa azaıady. Bul úrdis zeınetaqy júıesine kúsh túsiredi jáne eger qazirgi zeınetaqy jasyn ózgertpese, zeınetaqy qorynyń daǵdarysyna alyp kelýi múmkin.

QHR Qoǵamdyq qaýipsizdik mınıstrliginiń bıyl aqpanda jarııalaǵan málimetterine sáıkes, 2020 jyly Qytaıdaǵy bala týý deńgeıi byltyrǵy jylmen salystyrǵanda 15%-ǵa tómendegen.

Statıstıka bıýrosynyń dereginshe, besinshi jyl qatarynan týý deńgeıi tómendep jatyr.

Eske sala ketsek, Qytaıda 1978 jyldan beri jumys istep kele jatqan «bir otbasy-bir bala» degen atpen tanymal bala týýdy shekteıtin saıasat 2016 jyly toqtatyldy.