Qytaı basshysynyń Qazaqstanǵa saparynyń ekonomıkalyq jáne saıası sıpaty bar – sarapshylar
Belgili ekonomıst Maqsat Halyq Qytaı basshysynyń elimizge kelýin ekonomıka turǵysynan alǵanda mańyzdy ekenin atap ótti.
Onyń sózinshe, qazirgideı geosaıası jaǵdaı shıelenisip turǵan kezde taýar tasymaldaý máselesi ózekti, kezek kúttirmeıtin másele.
«Ekonomıkalyq turǵydan alsaq, bul sapardyń bizdiń memleket úshin mańyzy zor bolmaq. Qazirgi tańda kórshi elderdegi jaǵdaıǵa baılanysty saýda-sattyq salasynda birqatar másele týyndap otyr. Sondyqtan da Qazaqstan arqyly ótetin Batys Eýropa-Batys Qytaı dálizi taýar tasymaldaýda mańyzdy bolyp tur. Elimiz osy jerde Eýropa men Qytaı arasyndaǵy kópir bolyp, biraz tabysqa, biraz paıdaǵa kenele alady. Alaıda bir mańyzdy máseleni esten shyǵarmaýymyz qajet. Kez kelgen iskerlik ekijaqty kezdesýlerdiń saıası astary bolady. Sondyqtan Qazaqstan osy tusta ekonomıkasy men óziniń ulttyq qaýipsizdik máselesin birinshi orynǵa qoıýy kerek»,-dedi ekonomıst.
Sonymen qosa qarjy mamany osy sapar barysynda elimizdiń ekonomıkasyna serpin beretin máseleler talqylansa, memleket úshin de, elimizdiń bıýdjeti úshin de ońtaıly sheshim bolatynyn jetkizdi.
«Sapar barysynda taýar aınalym protsesin tsıfrlandyrý máselesin jolǵa qoıý, tek shıkizat emes, daıyn ónimdi ımporttaý máselesi qarastyrylsa, jaqsy bolar edi. Biz óndiristiń osy baǵytyn damytýdy qolǵa alýymyz kerek. Sonymen qosa Qazaqstannyń jasyl energetıka, ınnovatsııalyq jobalar baǵytyndaǵy ınvestıtsııalyq áleýetin arttyryp, Qytaı tarapyn osy salalarǵa ınvestıtsııa quıýǵa shaqyrýymyz qajet. Osyndaı mańyzdy máselelerge kóbirek kóńil bólýi tıis»,-dep atap ótti Maqsat Halyq.
Beligil qazaqstandyq ekonomıst Arman Baıǵanov ta Qytaı basshysynyń Qazaqstanǵa saparynyń ekonomıkalyq jáne saıası sıpaty bar ekenin tilge tıek etti.
«Qytaı basshysynyń Qazaqstanǵa saparynyń ekonomıkalyq jáne saıası sıpaty bar. Ekonomıka turǵysynan Qytaı Qazaqstan ekonomıkasyna kóbirek ınvestıtsııa quıǵysy keledi. Meniń oıymsha, ásirese shıkizat jáne agrarlyq sektorlarǵa basymdyq berýdi maqsat etip otyr», - dedi ekonomıst.
Aıta eteıik, 2021 jyldyń 1 shildesindegi jaǵdaı boıynsha, Qazaqstannyń Qytaıǵa quıǵan ınvestıtsııasynyń kólemi 4 324 mln dollardy qurady, bul Qytaıdyń Qazaqstanǵa jınaqtalǵan ınvestıtsııa kóleminiń úshten biri (12 918 mln dollar).
Sonymen qosa, onyń sózinshe, sapar aıasynda birqatar ekijaqty kelisimge qol qoıylmaq. «Jalpy Qytaı munaı-gaz sektoryna kóbirek ınvestıtsııa quıýda. Al qazir álemde energetıkalyq resýrstar úshin kúres júrip jatyr. Qazaqstanda munyń bári bar. Sonymen qatar Qytaı azyq-túlik qaýipsizdigi máselelerine de basa nazar aýdara otyryp, aýyl sharýashylyǵy salasyna kóbirek ınvestıtsııa salýdy kózdep otyr. Investıtsııanyń tek óndirýshi ónerkásipke ǵana emes, qaıta óńdeý ónerkásibine jasalǵany durys bolar edi. Sonda jańa jumys oryndary ashylar edi», - dedi sarapshy.
Jalpy, Arman Baıǵanovtyń paıymdaýynsha, ekonomıkalyq turǵydan alǵanda, ekinshi qýatty álemdik derjava kóshbasshysynyń elimizge kelýi el ekonomıkasynyń damýyna úlken serpin bermek. Sonymen qatar Qytaı Qazaqstanmen saýda aınalymy boıynsha Reseıden keıingi ekinshi orynda tur. Sondyqtan Qytaı Halyq Respýblıkasy Tóraǵasynyń sapary Qazaqstan úshin Qytaıǵa eksport kólemin arttyrý turǵysynan mańyzdy ekenin atap ótti.
Ashyq kózderden alynǵan foto
