Qytaı basshylyǵy B.Obamany AQSh prezıdenti laýazymyna qaıtadan saılanýymen quttyqtady
BEIJІŃ. 7 qarasha. QazAqparat - QHR tóraǵasy Hý Tszıntao jáne QHR Memlekettik keńesiniń premeri Ven Tszıabao Barak Obamaǵa onyń AQSh prezıdenti laýazymyna qaıtadan saılanýyna baılanysty quttyqtaý jedelhattaryn joldady.
Bul týraly búgin kezekti baspasóz máslıhatynda QHR SІM-niń resmı ókili Hýn Leı habarlady.
Qytaılyq dıplomattyń aıtýynsha, sońǵy tórt jyl boıy eki taraptyń kúshimen qytaılyq-amerıkandyq qatynastar jaqsy damydy.
Qytaı aımaqtyń jáne álemniń eki halqynyń múddesi turǵysynda AQSh-pen áriptestik qarym-qatynasty alǵa jyljytý jáne damytý úshin birlesken jumysty jalǵastyrýǵa daıyn, dep atap ótti qytaılyq dıplomat.
QazAqparat tilshisine bergen suhbatynda QHR Syrtqy ister mınıstriniń orynbasary Chen Gopın búginde saılaýdyń aldyn ala qorytyndylary jarııalanǵanyn aıtty, oǵan sáıkes Barak Obama óziniń qarsylasynan aıtarlyqtaı ozyp keledi.
Ol Qytaıda QKP-nyń 18 sezi ashylyp otyrǵanyn, onda partııanyń jańa basqarýshy quramy saılanatynyn atap ótti. «Qytaı men AQSh - álemniń eki alyp derjavasy, osyǵan baılanysty olardyń ózara qarym-qatynastarynyń betalysy búkil álemniń nazarynda», - dedi Chen Gopın.
«Qytaıdyń joǵarǵy partııalyq jáne memlekettik quramyndaǵy kadrlyq ózgeristerge qaramastan, bizdiń syrtqy saıasatymyzdyń sabaqtastyǵy saqtalady», - dep atap ótti ol.
