Qytaı bankteri valıýta tapshylyǵyna tap boldy
BEIJІŃ. QazAqparat - Qytaı bankteri aǵymdaǵy jyldyń tamyzynda valıýta tapshylyǵyn basynan ótkerdi. Bul sońǵy 13 aıdaǵy Qytaıdaǵy alǵashqy jaǵdaı, dep habarlady jergilikti BAQ.
Ótken aıda bankter 147,4 mlrd. dollar kóleminde valıýta satyp, 146, 6 mlrd. dollar satyp alǵan. Nátıjesinde shamamen 800 mln. dollar valıýta tapshylyǵy oryn aldy. Bıylǵy shilde aıyndaǵy kórsetkishpen salystyrǵanda aıtarlyqtaı aıyrmashylyq oryn alyp otyr. Ol kezde valıýta profıtsıti 1,2 mlrd. dollardy quraǵan edi.
Ekonomıster bunyń sebebi retinde eki negizgi faktordy aıtýda - Qytaı ekonomıkasynyń damý qarqynynyń báseńdeýi jáne AQSh ekonomıkasynyń qalypqa kelý esebinen dollardyń ary qaraı nyǵaıý áleýeti.
Qytaıdyń jeke tulǵalary men kompanııalary sheteldik valıýtany ustaýdy jón sanaıdy. Óıtkeni sońǵy kezderi Qytaıdyń resmı valıýtasyna qysym túsýde, bul onyń qunsyzdanýyna soqtyrady.
