Qytaı azamatyn qutqarǵan qazaq stýdenti: Elimniń medıtsınasyna óz úlesimdi qossam deımin
ASTANA. QazAqparat - 12 qyrkúıek kúni Qytaı astanasy Beıjińde bilim alyp júrgen qazaqstandyq stýdent Ǵalymjan Isabekov metroda esinen tanyp qalǵan qytaılyq qarııaǵa der kezinde medıtsınalyq kómek kórsetip, janyn aman alyp qaldy. Qazaqstandyq stýdenttiń qıyn sáttegi batyl qımyly qytaılyq BAQ pen ınternet paıdalanýshylarynyń arasynda keńinen talqylanǵan bolatyn. Otandasymyzǵa qytaılyqtar zor alǵystaryn bildirip, ıgi isi úlgi tutarlyq degen pikir qaldyryp jatyr. Osy rette «QazAqparat» HAA tilshisi shetelde bilim alyp jatqan jas mamanmen suhbattasqan edi.
- Ǵalymjan, ózińiz týraly qysqasha aıta ketseńiz... Qytaıǵa oqýǵa barýǵa ne sebep boldy?
- Men Almatyda týyp óstim. Qazaq-túrik lıtseıinde oqyp, 2008 jyly Beıjiń qalasyna keldim. Qytaıǵa kelýimniń sebebi de bar. Mektep oqyp júrgenimde Eýropaǵa baryp, bilim olımpıadasyna qatysyp qaıttym. Sol kezde qytaılyq oqýshylardyń bilimi meni qatty tań qaldyrǵan edi. Sodan bastap Shyǵys Azııa elderine qyzyǵýshylyǵym arta tústi. Japonııa, Koreıa jáne Qytaı elderiniń birine baryp bilim alsam degen josparym boldy. Sońǵy tańdaýym Qytaıǵa tústi. Bastapqyda Qytaı Halyqtyq ýnıversıtetine ekonomıka mamandyǵy boıynsha oqýǵa tústim. Alaıda mamandyqqa kóńilim tolmaýyna baılanysty medıtsınaǵa aýystym. Qazir neırohırýrgııa mamandyǵy boıynsha bilim alyp jatyrmyn. Kelesi jyly Qytaıǵa kelgenime 10 jyl tolady. Osynda ómirlik jarymdy kezdestirdim, shańyraq kóterdim. Áıelim - Almaty qalasynyń týmasy, ol da dástúrli qytaı medıtsınasy mamandyǵy boıynsha bilim alyp jatyr.
- Sizdiń esinen tanyp qalǵan qarııany qutqaryp qalǵanyńyz týraly BAQ betinde kóp jazyldy. Bolǵan is jaıly óz aýyzyńyzdan estisek...
- Iá, bul men úshin kútpegen jaǵdaı boldy. Magıstrant retinde Beıjiń qalasynyń Sıýaný aýrýhanasynda rezıdent bolyp jumys istep júrmin. Kúndelikti ýaqytta metrodan Sıýaný aıaldamasynan túsken kezimde kómek suraǵan adamdardyń daýysyn estip, esinen tanyp jatqan qart adamdy kórdim. Janyna júgirip bardym. Tynysy toqtap qalǵan eken. Alǵan bilimim boıynsha júrekke massaj jasap, alǵashqy kómek kórsettim. Osydan keıin kóp keshikpeı, jedel járdem kóligi keldi. Qarııany Sıýaný aýrýhanasyna alyp ketti.
- Qytaıda esinen tanyp nemese taıyp jyǵylǵan adamǵa kómek kórsetkenderge jalǵan aıyp artylatyn oqıǵalar jıi bolatyny jóninde estip edik. Siz osyndaı jaǵdaıǵa dýshar bolamyn dep oılamadyńyz ba?
- Dáriger retinde adamdy qutqarý meniń birinshi mindetim dep sanaımyn. Sondyqtan ondaı oılar mende bolǵan joq. Ol adamdy aman alyp qalýǵa tyrysqanymdy kýágerler kórip turdy. Metro kúzetshisi de janyma kelip, eger qandaı da bir másele týyndap jatsa, ózi kýáger bolatynyn aıtty. Oqıǵadan keıin qarttyń balalary meni izdep, Sıýaný aýrýhanasyna habarlasypty. Men de naýqastyń jaǵdaıyn bilý úshin emhanaǵa júgingen edim. Іstiń mán-jaıyn bilgennen keıin ustazdarym kópke úlgi bolsyn degen maqsatpen bul oqıǵa týraly jarııalaý kerek dep sheshti. Men kelisimimdi berdim. Al qarııanyń balalary meni aýrýhanaǵa arnaıy izdep kelip, alǵysyn aıtty.
- Endi ózińizdiń josparyńyzǵa toqtalyp ótseńiz... Oqý bitirgen soń elimizge oralyp eńbek etesiz be?
- Ázirge mamandyǵym boıynsha magıstratýrany oqyp bitirý - basty josparym. Keıin osy salada Qazaqstan-Qytaı arasynda altyn kópir bolyp, elimizdegi naýqastardyń Qytaıda emdelýine, sondaı-aq, elimizdiń medıtsına salasynyń órkendep ósýine óz úlesimdi qossam degen armanym bar. Árıne, áli de bilimimdi shyńdap, shetelden bolmasa osy Qytaıdan doktorlyq ataǵyn alyp, elimizge qyzmet etýdi de josparlap otyrmyn.
- Suhbat bergenińizge rahmet, isińiz ilgeri jyljysyn!
- Sizge de rahmet!
