Qytaı azamaty ushaqta qazaqstandyqtyń qomaqty qarajatyn urlap alǵan
ASTANA. QazAqparat - Qytaı azamaty qazaqstandyq áýe kóligi jolaýshysynyń iri kólemdegi qarajatyn tonap ketken, dep habarlaıdy Kóliktegi ІІD baspasóz qyzmetinen.
«2015 jylǵy 19 qazan kúni tańǵy saǵat 07:15-te Almaty áýejaıyndaǵy jelilik polıtsııa bólimine Almaty qalasynyń turǵyny azamat E.Týrabekovten «Máskeý-Almaty» baǵyty boıynsha ushý kezinde portfelinde turǵan 280 000 teńge aqshasyn urlatqany týraly aryz kelip túsken. Atalǵan qylmysqa qatysty kúdikti retinde QHR azamaty ustaldy. Kúdikti jolaýshy retinde osy áýe marshrýtymen ushyp kelgen, budan soń «Almaty-Beıjiń» baǵytymen ushýdy jalǵastyrmaq bolǵan. Sotqa deıingi tergeý barysynda QHR azamaty jasaǵan aıybyn tolyq moıyndap, ol azamattan 280 000 teńge aqsha alyndy», delingen habarlamada. Qylmystyń jolyn kesý maqsatyndaǵy sharalar qolǵa alyndy.
