Qytaı aýmaǵynda Qazaqstannyń 780 azamaty júr - SІM
QR Densaýlyq saqtaý mınıstri Eljan Birtanovtyń bergen málimeti boıynsha, búgingi tańda Qazaqstanda koronavırýstyq ınfektsııamen syrqattaný jaǵdaılary tirkelmegen. QHR-men memlekettik shekara arqyly barlyq ótkizý pýnktterinde sanıtarlyq-epıdemıologııalyq baqylaý jumystary jalǵasýda, onyń barysynda osy jyldyń 6 qańtarynan bastap 21,8 myń adam qaraldy.
«Osy jyldyń 5 aqpanyndaǵy jaǵdaı boıynsha 104 adam joǵary temperatýramen aýrýhanaǵa jatqyzyldy, olardyń 71-i búginde aýrýhanadan shyǵarylǵan. Statsıonarlarda 33 adam qalyp otyr, barlyǵyna koronavırýsqa qatysty zertteý júrgizildi – nátıjeleri teris», — dedi Eljan Birtanov.
Sondaı-aq taıaýda Ýhan qalasynan evakýatsııalanǵan 83 otandasymyz karantınge jatqyzylǵan edi. Zerthanalyq tekserýler elge oralǵandardyń boıynda da koronavırýstyq ınfektsııanyń joq ekenin anyqtady.
Óz kezeginde QR Syrtqy ister mınıstriniń birinshi orynbasary Shahrat Nuryshev qazirgi tańda QHR aýmaǵynda QR-nyń 780 azamaty, onyń ishinde 559 stýdenti júrgenin habarlady. Qazaqstanǵa jetkizý týraly 427 adam ótinish bergen, qalǵandary QHR-da qalýǵa nıet bildirgen. Syrtqy saıası vedomstvo dıplomatııalyq arnalar arqyly azamattarymyzdy elge áketýdi uıymdastyrý múmkindigin pysyqtap jatyr.
Osy jyldyń 3 aqpanynan bastap QHR reısterine bıletteri bar jolaýshylarǵa avıabıletterdi satyp alý orny boıynsha qaıtarý nemese qaıta resimdeý júzege asyrylýda. Bul jaǵdaıda problema joq, dep sendirdi QR ındýstrııa jáne ınfraqurylymdyq damý vıtse-mınıstri Berik Kamalıev.
Sondaı-aq komıssııa otyrysynda atqarylyp jatqan jumystar týraly ishki ister vıtse-mınıstri A. Kalaıchıdı, bas memlekettik sanıtarlyq dáriger J. Bekshın, Almaty, Shyǵys Qazaqstan oblystary, Nur-Sultan jáne Almaty qalalary ákimderiniń orynbasarlary baıandady.
Keńesti qorytyndylaı kele, Berdibek Saparbaev koronavırýstyń paıda bolýy men taralýyna jol bermeý boıynsha birqatar naqty mindetterdi belgilep, barlyq qyzmetterdiń jumysty kúsheıtilgen rejımde jalǵastyrýy qajet ekenin atap ótti.
