Qytaı aýany tazartýǵa 4,5 mlrd dollar jumsady
ASTANA. QazAqparat - Qytaıdyń úlken qalalaryndaǵy ekologııalyq ahýal ońala bastady, dep jazady Habar 24.
Bılik bul nátıjege jylytý maýsymy kezinde kómirdi elektr qýatymen almastyrý arqyly qol jetkizdi. Qazir eldiń soltústik aımaqtaryndaǵy megapolısterde kórsetkish anaǵurlym jaqsarǵan. Osylaısha Qytaı 2020 jylǵa deıin kómir paıdalanýdy 60 paıyzǵa deıin azaıtpaq.
Beıjińde elektr qýatyn paıdalanýdyń rekordtyq deńgeıi tirkeldi. Qytaı astanasynda onyń kólemi 17,8 mln kVt-ty qurady.
Mamandardyń aıtýynsha, jylytýdy jappaı elektr qýatyna kóshirýge baılanysty energetıkalyq júktemege kúsh tústi. Qazirgi jylytý maýsymynyń eń qaýyrt shaǵynda toqty paıdalaný ótken jylmen salystyrǵanda 11 paıyzǵa artyp otyr. Kómir jaǵýdy azaıtqany aýa synamasynan da sezildi. Qalada qorshaǵan ortaǵa bólinetin zııandy zattardyń mólsheri 35 paıyzǵa azaıdy. Bul - sońǵy 5 jylda bolmaǵan kórsetkish.
«Kómir otynynyń ornyn toltyrý maqsatynda Qytaı qazir balamaly energııa kózderin damytýǵa basty nazar aýdaryp otyr. 2010 jyldan bastap úkimet qorshaǵan ortanyń sapasyn baqylaýǵa aldy. Al úlken qalalarǵa aýanyń lastaný deńgeıin 10 paıyzdan asyrmaýy tıis degen tapsyrma júkteldi», - deıdi Qalany damytý jáne qorshaǵan ortany zertteý ortalyǵynyń dırektory Pan Tszıahýa.
Beıjińdegi qatty otyn jaǵyp kelgen 1 mıllıonnan astam turǵyn úı toqpen jylytý júıesine kóshirildi. Energetıkalyq júktemeniń 40 paıyzy osy maqsatqa jumsalyp otyr. Megapolıstegi ekologııalyq ahýaldyń jaqsarǵanyn turǵyndar da sezgenin aıtady.
«Ótken jyldarmen salystyrǵanda bıyl kók aspandy jıirek kóretin boldyq. Eshqandaı maska kımeı-aq, jumysqa kóńildi baramyn. Byltyr tútin kúnderi syrtqa shyqpaýǵa tyrysatynmyn, qazir olaı emes», - deıdi Beıjiń qalasynyń turǵyny Tao Lıan.
Beıjiń qalasynyń qorshaǵan ortany qorǵaý basqarmasy sońǵy 2 jylda aýany tazartýǵa 4,5 mıllıard dollar jumsady. Jylytý júıesin elektr qýatyna kóshire almaı otyrǵandarǵa tehnıkalyq jáne materıaldyq kómek jasady. Endi megapolıstiń ákimshiligi 2018-2022 jyldarǵa arnalǵan jańa jospar ázirlep jatyr. Qazir Qytaı eldiń soltústik aımaqtaryn birtindep elektr qýatymen qosa, tabıǵı gazǵa da kóshirmekshi.
