Qytaı arqyly Tynyq muhıty jaǵalaýy rynogyna 3 mln. tonnaǵa deıin astyq eksporttaýǵa kelisim jasaldy
ASTANA. Jeltoqsannyń 14-i. QazAqparat /Qanat Mámetqazyuly/ - Qytaı arqyly Tynyq muhıty jaǵalaýy rynogyna 3 mln. tonnaǵa deıin astyq eksporttaýǵa kelisim jasaldy. Búgin Úkimet basshysy Kárim Másimovtiń qatysýymen ótip jatqan agroónerkásip kesheni respýblıkalyq keńesinde «QazAgro» holdıngi basqarma tóraǵasy Asyljan Mamytbekov osylaı málim etti,
dep habarlaıdy QazAqparat.
«Qazaqstanda ádettegi egis jyldary ortasha alǵanda 16-17 mln. tonna astyq jınalady. Onyń ishinde óz ishki suranysyna 8-9 mln. tonna ketse, Ortalyq Azııa, Iran, Aýǵanstan sekildi dástúrli rynogyna 8 mln. tonnaǵa jýyq astyq eksporttalady. Bıyl 20 mln. tonnaǵa jýyq egin jınaldy. Bul ortasha jyldyq kórsetkishten 3-4 mln. tonnaǵa artyq. Sondaı-aq bıylǵy jyly bizdiń astyq ótkizýdegi dástúrli rynoktyq elderde de astyq mol boldy. Budan basqa, elimizde byltyrǵy jyldan qalǵan 3 mln. tonna astyq taǵy bar bolatyn. Osynyń barlyǵy astyq naryǵynyń turaqsyzdyǵyna, baǵanyń túsýine ákep soqty», dedi A. Mamytbekov.
Onyń aıtýynsha, osy máseleni Úkimet tarapynan jedel sheshý barysynda eksporttyq baǵyt yntalana bastady. Máselen, temir jol tarıfteriniń 20 dollarǵa deıin arzandatylýy qazaqstandyq astyqtyń Baltyq jáne Qara teńiz naryqtarynda básekelestigin arttyrdy. «Qytaı arqyly Tynyq muhıty jaǵalaýy nyryǵyna 3 mln. tonnaǵa deıin astyq eksporttaýǵa kelisim jasaldy. Budan basqa Qytaıdyń ishki naryǵyna da astyqty jetkizý múmkindigimiz bar», dedi A. Mamytbekov.
