Qytaı arqyly Ońtústik Azııaǵa shyǵýǵa múmkindik bar - Baqytjan Saǵyntaev
ASTANA. QazAqparat - QR Premer-Mınıstri Baqytjan Saǵyntaev kásipkerlerdi kórshi Qytaı arqyly Ońtústik Azııa elderine shyǵýǵa úndedi, dep xabarlaıdy QazAqparat tilshisi.
"Qazir barlyq naryqtar ashylyp jatyr. Ásirese, Qytaıdyń úlken naryǵyn erekshe atap ótken jón. Qytaı úkimeti tarapynan da usynystar boldy. Olar birlesken kásiporyndardy qurý arqyly qazaqstandyq ónimderdi basqa elderge jetkizýge bolady deıdi. Bul degenimiz, otandyq kásipkerler qytaılyq áriptesterimen birlesip, Qytaı arqyly Ońtústik Azııaǵa shyǵa alady. Abylaı Isabekuly (Atamekenniń basqarma tóraǵasy - avt.), osy máseleni jaqsy biledi. Sondyqtan osy múmkindikti sátti paıdalanamyz degen úmit bar", - dedi B.Saǵyntaev "Atameken" UKP Prezıdıýymynyń keńeıtilgen otyrysynda.
Úkimet basshysynyń aıtýynsha, búginde qazaqstandyq kásipkerler biraz ónimderin Qytaıdyń ózine tasymaldaı almaıdy. Degenmen, ol taýarlardy osy memleket arqyly Ońtústik Azııaǵa shyǵarýǵa ábden bolady.
Aıta keteıik, kúni keshe Úkimet otyrysynda da otandyq ónimderdi Qytaıǵa tasymaldaý máselesi qaraldy.
QR Aýyl sharýashylyǵy vıtse-mınıstri Arman Evnıevtiń aıtýynsha, búgingi tańda balyq, asyl tuqymdy jylqylar, qoı eti, bal, bıdaı, bıdaı kebegi, soıa burshaǵy, raps, sıyr eti, jońyshqa, un, ósimdik maıy, arpa men júgeri úshin Qytaı naryǵy ashyq.
"Osynyń arqasynda 9 aıdyń ishinde Qazaqstannan Qytaı eline aýyl sharýashylyǵy ónimderiniń eksporty 42 protsentke ulǵaıdy. Iran tarapynan tiri qoıdy, tońazytylǵan jáne salqyndatylǵan qoı etin, sıyr etin, taǵamdyq jumyrtqany jetkizýge arnalǵan veterınarııalyq talaptar kelisildi. Bıyl tiri iri qara malǵa qoıylatyn talaptardy kelisý josparlanyp otyr. Sondaı-aq, iri qara jáne usaq maldy Saýd Arabııasyna, al et pen et ónimderin, taýyq jumyrtqasyn Birikken Arab Ámirlikterine jetkizýge qatysty shekteýler alynyp tastaldy", - dep atap kórsetti A.Evnıev.
