Qytaı AÓSShK-ni ınstıtýtsıonalandyrýdy odan ári jalǵastyrý boıynsha birqatar sharalardy usyndy
ShANHAI. QazAqparat - Qytaı Azııadaǵy ózara is-qımyl jáne senim sharalary keńesin odan ári ınstıtýtsıonalandyrý boıynsha birqatar sharalardy usyndy. Olardyń qataryn QHR Tóraǵasy Sı Tszınpın atalǵan halyqaralyq uıymnyń 4-sammıtiniń birinshi sessııasynda sóılegen sózinde jarııalady.
«Qytaı tarapy búkil Azııany qamtıtyn AÓSShK-ni qaýipsizdik boıynsha yntymaqtastyq pen pikir almasý alańyna aınaldyrýdy usynady jáne sonyń negizinde aımaqtyq qaýipsizdik pen yntymaqtastyqtyń jańa arhıtektýrasyn ázirleýde», - dedi ol.
Ol AÓSShK-ǵa múshe elderdiń Syrtqy ister mınıstrleriniń otyrysyn jıi uıymdastyrýdy, onyń Hatshylyǵynyń qyzmetin keńeıtýdi, forým aıasynda qorǵanys salasyndaǵy konsýltatsııa mehanızmin qurýdy, barlyq 5 sala boıynsha (ekonomıkalyq, ekologııalyq, gýmanıtarlyq, áskerı-saıası, jańadan týǵan qaýipter-qatermen kúres) senim sharalarynyń oryndalýyn baqylaıtyn jumys tobyn qurýdy usyndy.
«AÓSShK úkimettik emes forýmyn uıymdastyrý arqyly qoǵamdyq negizde almasý jelisin qurýdy usynamyz. Bul AÓSShK qaýipsizdik tuǵyrnamasyn taratý aýqymyn keńeıtý úshin nyq áleýmettik negiz qalaýǵa jáne onyń bedeli men yqpalyn kúsheıtý úshin qajet», - dep atap ótti Sı Tszınpın.
Qytaı basshysy AÓSShK-niń ınklıýzıvtiligi men ashyqtyǵyn arttyrý, sondaı-aq basqa aımaqtyq jáne halyqaralyq uıymdarmen ózara yqpaldastyqty tereńdetý qajettigin atap ótti. Sı Tszınpın «úsh zuldymdyqpen» (terrorızm, ekstremızm jáne separatızm) kúresýde jıi tájirıbe almasý men yqpaldastyq mehanızmin, ıaǵnı Azııa elderi arnaıy qyzmetter forýmy men jyldam áreket etý ortalyǵyn qurýdy usyndy. Eske sala keteıik, búgin, 21 mamyrda Shanhaıda Azııadaǵy ózara is-qımyl jáne senim sharalary keńesiniń (AÓSShK) 4-shi sammıti óz jumysyn bastady.
Sammıtke qatysý úshin Shanhaıǵa Qazaqstan, Ázerbaıjan, Reseı, Pákistan, Qyrǵyzstan, Iran, Ózbekstan, Tájikstan, Aýǵanstan, Mońǵolııa, Shrı-Lanka basshylary jáne Kambodja premer-mınıstri, sonymen birge BUU bas hatshysy Pan Gı Mýn keldi. Túrkııa Prezıdenti Abdýlla Gúl shahtadaǵy kenshilerdiń qaza bolýyna baılanysty kelgen joq. Sammıtke Túrkııanyń atynan eldiń Syrtqy ister mınıstri qatysýda.
Keshe sammıt aıasynda Qazaqstan Prezıdenti Nursultan Nazarbaev, Reseı Prezıdenti Vladımır Pýtın, Qyrǵyzstan Prezıdenti Almazbek Atambaev jáne Iran Prezıdenti Hasan Roýhanı Qytaıǵa memlekettik sapar jasady.
