Qytaı alty jańa atom reaktorynyń qurylysyn maquldady

BEIJІŃ. QazAqparat – Qytaı bıligi úsh atom elektr satntsııasynda alty jańa atom reaktorynyń qurylysyn maquldady. Bul týraly Qytaı ıadrolyq energetıka qaýymdastyǵynyń (CNEA) málimdemesinde aıtylǵan, dep habarlaıdy «QazAqparat» HAA menikti tilshisi.

Qaýymdastyqtyń málimetinshe, jańa energobloktar Shyǵys Qytaıdyń Chjetszıan provıntsııasyndaǵy «Sanmen» AES-inde, «Haııan» AES-inde (Shandýn, Shyǵys Qytaı) jáne «Lıýfen» AES-inde (Gýandýn, Ońtústik Qytaı) iske qosylady.

Salalyq basylymdardyń jazýynsha, «Sanmen» jáne «Haııan» AES-tarynyń ekinshi kezeginde SAR-1000 atom reaktorlaryn, al «Lıýfen» AES jańa alańynda «Hualong – 1» reaktorlaryn ornatady.

Ekinshi kezektegi eki jańa energoblokty iske qosqannan keıin «Haııan» AES-i jyldyq elektr energııasyn óndirý qýaty 20 mlrd kVt*saǵatty quraıtyn bolady. Bul 2 mıllıonǵa jýyq adamnyń elektr energııasyna degen jyldyq suranysyn qanaǵattandyrýǵa, kómirdi tutynýdy jylyna 8,55 mln tonnaǵa azaıtýǵa, sondaı-aq kómirtegi qostotyǵy, kúkirt qostotyǵy men azot totyǵy shyǵaryndylaryn tıisinshe 16 mln tonnaǵa, 52 myń tonna jáne 45 myń tonnaǵa azaıtýǵa múmkindik beredi.

Salalyq sarapshylardyń baǵalaýyna sáıkes, III býyndy bir atom reaktorynyń quny 20 mlrd ıýandy (3,1 mlrd AQSh dollary) quraıdy. Úsh AES-te alty energııa blogyn iske qosýǵa arnalǵan ınvestıtsııalardyń jalpy kólemi shamamen 120 mlrd ıýanǵa (18,6 mlrd AQSh dollary) jetedi.

Álemdegi ekinshi iri ıadrolyq energııa óndirýshisi Qytaı óziniń klımattyq maqsattaryna jetý úshin ıadrolyq energııaǵa ınvestıtsııa salýdy jalǵastyrýda.