01:42, 18 Qyrkúıek 2022 | GMT +6
Qytaı 2025 jyly ǵaryshqa aqyly saparlardy iske asyra bastaıdy
BEIJІŃ. QazAqparat – Qytaı 2025 jyly ǵaryshqa aqyly saparlardy iske asyra bastaıdy, dep habarlaıdy «QazAqparat» HAA menshikti tilshisi Hýantsıý Shıbao basylymyna silteme jasap.
Málimetke súıensek, Qytaıdyń kommertsııalyq ǵarysh sektory sýborbıtaldy ǵarysh ushyrylymdaryn 2025 jyly uıymdastyra bastaıdy. Bul rette, bıletter quny 2-3 mln ıýan ($286,4 myń - 429,6 myń dollar) shamasynda bolady.
Basylymnyń jazýynsha, Qytaıdyń kommertsııalyq aeroǵarysh salasy naryǵynyń jalpy kólemi 2030 jylǵa qaraı 100 mlrd ıýanǵa (14,3 mlrd dollarǵa jýyq) deıin jetýi yqtımal.
2021 jyly atalmysh elde spýtnıkter óndirisimen, raketalardyń ushyrylymymen jáne klıentterge orbıtaldy spýtnıkter bazasynda qyzmetter kórsetýmen aınalysatyn 370-ten astam kásiporyn tirkelgen bolatyn.
Buǵan deıin Virgin Galactic kompanııasy ǵaryshqa saparlardy iske asyra bastaǵanyn jarııalaǵan bolatyn. Bılet quny – 450 myń dollar.
