Qytaı 2021 jyldyń aıaǵynda Kúndi zertteıtin alǵashqy serik ushyrmaqshy

BEIJІŃ-ChJÝHAI. QazAqparat – Qytaıda bıyl Kúndi zertteıtin alǵashqy jasandy serik (spýtnık) ushyrylady. Bul týraly osy kúnderi ótip jatqan Airshow China 2021 Halyqaralyq avıatsııalyq-ǵarysh kórmesi kezinde Shanhaı ǵarysh saparlary tehnologııalary akademııasy (SAST) málim etti, dep habarlaıdy QazAqparattyń menshikti tilshisi.

SAST habarlaýy boıynsha, Qytaı osy jyldyń aıaǵyna deıin óziniń Kúndi zertteıtin birinshi jasandy serigin ushyrmaq nıette. Onyń ishindegi kún spektometri Kúnniń sýretterin jınap, zertteýshilerge ondaǵy jarqyldar kezindegi ózgeristerdi baqylap otyrýǵa múmkindik beredi.

SAST seriktiń jiberilýiniń Kúndi zertteýdi ilgeriletip, ónerkásiptegi joǵary tehnologııalyq salalardyń damýyna yqpaldasyp, Kúndi halyqaralyq zertteý isine úlesin qosady dep úmittenedi.

Eske sala keteıik, 28 qyrkúıek pen 3 qazan aralyǵynda Qytaıdyń ońtústigindegi Gýandýn provıntsııasyndaǵy Chjýhaı qalasynda Airshow China 2021 13-shi Halyqaralyq avıatsııalyq-ǵarysh kórmesi ótýde. Bıyl atalmysh kórmede 40 el men óńirdiń 700 kompanııasynyń azamattyq jáne áskerı tehnıkasy, aeroǵaryshtyq jáne qorǵanys ónimderiniń myńdaǵan úlgileri kórsetiledi.

Airshow China uıymdastyrý komıetti 14-shi Halyqaralyq aeroǵarysh kórmesi Chjýhaı qalasynda 2022 jyldyń 2-13 qarashasy aralyǵynda ótetini týraly habarlady.